[خالدخليفة]

فايق كراس
راجل ظريف بيضحك دايما مع الناس مرح مبيكشرش ابدا
من كبار تجار قبلى وعنده شركة توزيع كبيرة
صوته عاااااااااااااااااااااالى جدا زى حالاتى
قرر فى يوم يزورنى فى مكتبى فى مصر الجديدة
وماله ياعم فايق تشرف وتنور
هجيلك بكرة بس اخر النهار
هستناك
وانا مستنى فى مكتبى لقيت بتاع الامن بيتصل بيا وعصبى
خير فى ايه
واحد صعيدى هنا وعامل مشكلة وبيقول انه صاحبك
وعرفت انه عم فايق
ونزلت ولقيت منظر عجيب
عم فايق قالع جاكتته ومرميه فى الارض وقميصه خارج بره
وبتاع الامن قميصه مبهدل وزراير القميص مقطوعة
وال 2 شعرهم منكوش ووشهم احمر
تحس اعلان حرب
خير ياجماعة فى ايه
عم فايق / البيه عايز بطاقتى
وانا فهمت
طبعا بتاع الامن طلب بطاقته وصاحبنا رفض
ورجل الامن اصر
والتانى قرر يـطلع بالعافية مسكو فى بعض
وكان المنظر الكوميدى ده
اخدته وفهمته ان العمارة اللى فيها المكتب بين قصرين تبع رئاسة الجمهورية ولازم الداخل والخارج يبقى معروف
وبعد م خلصنا شغل اصر نتعشى سوا
فقلت ماشى بس من غير لحمة
فغمز لى وضحك وقال / ماشى
وبالليل
حب يهزر معايا تحب تقضى ليلة حمرا ياشيخ
وانا استعبطت وقلت / مفيش الوان تانية
ضحك وقال /اختار اللون اللى يعجبك ونلون لك الليلة هههههههه
قلت له /انا آخرى كوباية الشاى وهقوم
وكازينو الليل مفتوح لمين
للشباب اللى زيك (وقتها كان عنده 55 سنة وجد )
ولما انا شباب اومال انت تبقى ايه
انا راجل تاجر وبس
اسمع الكلام طول م انت كده دى هتروش امن الدولة وهتخليهم وراك ليل نهار لكن لو روحت كازينو الليل هتوفر عليهم مرتب الواحد ده
وضحكنا ومشيت ومشفتوش تانى من ساعتها