[خالدخليفة]

وبمناسبة الاسعاف
فاكرين جمال سواق التاكسى اللذيذ اللى كان بيسافر معايا ؟؟؟ صاحب الدماغ العالية
فى يوم مسافرين سوا انا وهو بس وفى الطريق لقينا حادثة واحد عربيته مخبوطة وهو مرمى جوه العربية والباب متطبق عليه
اقف ياجمال
ياعم انت غاوى مشاكل
اقف بس
حاااااااااضر (بقرف)
جريت على الراجل لقيته بيقول أه أه أه ورفع عينه شافنى
وقال بصوت ضعيف / الحقنى الحقنى طمنته وقلتله متخافش
لفيت ايدى فى منديل ورق ومسكت باب العربية وبفتحه مفتحش متطبق على الراجل جوه
وقفت على الطريق
وقفت سواق عربية جامبو
عايزين نخرج الراجل ده
انا هفتح لك الباب ومليش دعوة بيه بعد كده
ماشى
وجاب عتلة ضخمة وطويلة وهو ماشاء الله كان قوى الجسم
ودب( بكسر الدال) طاخ دب طاخ
دغدغ الباب وفتحه رماه على الارض وسابنى ومشى
وناديت جمال كان واقف بعييد
ياعم والله هتحبسنا
تعال بس
لف ايدك فى فوطة من بتوع العربية
لف ايديه ال2 وانا لفيت ايديا ال 2 (علشان البصمات )وشلناه نقلناه على جنب
وطلبت له الاسعاف
مسئول الاسعاف /اسمك ايه
انا / محمد احمد السيد
تليفونك
010
قاطعنى وقال / عايزين الارضى
ماشى
مليته رقم غلط
قال ماشى انت فين
فى الحتة الفلانية
استنى متمشيش واحنا جايين (طبعا دى بومبة من الاسعاف علشان ييجى يمسكك ويقول انت اللى خابطه)
ادامكو كتير
اقل من نص ساعة
مستنى
وجمال بيمووووت ف جلده
انت واقف مستنيهم انت عايز تحبسنا
اسكت شوية ياجمال
اسكت ازاى انا همشى
وتسيبنى
اومال استنى علشان نتحبس احنا ال2
ياعم اسكت شوية
سكت وهو متغاظ
اتصلت بالاسعاف تانى وصلونى بالعربية فقالو بيننا وبينك 10 دقايق
وفعلا بعد م قفلت معاه بحوالى 5 دقايق لقيت انوار العربية ظهرت من بعيد
ياجمال
وادور على جمال مش لاقيه
يانهارك ابيض ياجمال هتسيبنى على الطريق السريع ؟؟؟
ياجمال
ياجمااااااااال والعربية قربت اوى
وانا جريت بعيد وبصيت لقيته راكن بعييييييد وبيشاورلى
جريت عليه
وانا وصلت له ومشينا بالعربية ولقيت الاسعاف وقفت عند الراجل المصاب
ولقيته بيترعش وهو بيسوق مالك ياجمال
بص لى
انت خلتنى قطعت الخلف
انت بتتلكك علشان لما تجوز تقول خالد السبب
هههههههههه
وقال ايه اللى انت عملته ده
قلت حط نفسك مكانه لاقدر الله مش هتبقى محتاج مساعدة ؟
قال م احنا طلبنا الاسعاف
انت عارف الاسعاف وشغل بلدنا ولازم نتطمن عليه قبل م نمشى
والا ايه ؟؟
قال ماشى
عشينى كباب
اجيبهولك منين على الطريق السريع
معرفش اتصرف هو انت تخلينى اقطع الخلف وتسيبنى من غير عشا
ماشى ياعم جمال
ولاجل حظه لمحت واحد بتاع كباب
وفضل ياكل ياكل ياكل
وشرب شاى ومعسل
ياعم يالا احنا هنبات هنا
قال لا
بس قالها بطريقة تقول اننا هنبات
وفوجئت بيه
ناااااااااااااااااااام
انا غلطان انى عشيتك
وفضلت جنبه لحد م صحى وروحنا