آسف للتأخير ولكن النت كان عطلان عندي شوية ، وأشكر كل من إهتم وشارك وياريت إذا كنت نسيت إجراء من الإجراءات في تجديد الرخصة ، فأي حد يساهم ويضيفه علشان إللي يحب يجدد رخصته يلاقي مرجع يرجعله خصوصاً إن كل معلومة أنا بقولها أنا إتشحطط فيها آخر شحططه علشان مافيش حد عارف حاجة ومافي حد من الموظفي يساعد أو يدل وإن فعل فغالباً بيدلك ويساعدك غلط ، ونكمل باقي مشوار العذاب إن شاء الله .........
المهم روحت مرور العتبة في يوم ثالث من أيام العذاب علشان أشوف مخالفاتي وبعد شوية شحططة صغيرين قدمت الرخصة مع ورقة بيان صرف اللوحات للموظف وشوية نده عليه وقال لي هوه كمان :" لأه!! رقم رخصتك مش عندنا ده حتلاقيه في مرور الدراسة "
المهم لم أستطع أن أفعل شيئاً غير إني إحتسبت الأجر عند الله تعالى وخدت بعضي وروحت على مرور الدراسة وبصراحة المعاملة هناك زي الفل وفي غاية السهولة واليسر تحس إن إنته في مرور الدراسة نظام أمريكاني والنظام في مرور السلام نظام 
والحمد لله إستلمت براءة الذمة ولاقيت إن مافيش عليه ولا مخالفة ودفعت عشرة جنيه ، علشان مش هاين عليهم ماتدفعش حاجة .
طبعاً اليوم كان خلص ولازم أروح مرور السلام مرة أخرى تاني يوم .
وهذا ماحدث روحت السلام وأنا كللي أمل إني مش هتشحطط شحططة شباك المخالفات مرة تانية ، ولكن للأسف طلع مشوار المخالفات إللي أنا عملته إنبارح كان للنمر القديمة !!!!!!!what
يعني كل الشحططة ديه علشان النمر القديمة إللي أنا سلمتها السنة إللي فاتت بعد ما قدمت براءة الذمة بتاعتها ، وفيه شحططة تانية لمخالفات النمر القديمة .
والحمد لله ولا حول ولا قوة إلا بالله بأه عندي لعربية واحدة نمرتين نمرة تبع مرور العتبة أقصد مرور الدراسة ، ونمرة تبع مرور السلام .
وبرضه لم أستطع أن أفعل شيئاً غير إحتساب الأجر عند الله تعالى ، ولميت شتات نفسي المحطمة وروحت أطلع براءة الذمة للمخالفات القديمة أقصد الجديدة ودواخيني يا لمونة
مع لقاء آخر مع ذكرياتي مع مرور السلامبوزو......