[خالدخليفة]

حكاية 5 دقايق
تصورو 5 دقايق بهدلتنى اد ايه
والحكاية
كنت مسافر مطروح فى الشتا وفى الشتا مطروح ملهاش غير اتوبيس واحد اعتقد بيقوم من ألماظة اعتقد 10 بالليل او 7 صباحا مش فاكر والميعادين غير مناسبين لانى مفروض اكون هناك 10 بالليل بالكتير

المهم
فركبت قطار الساعة 3:30 العصر وده معاده 6 بالدقيقة سيدى جابر ونادرا ما يتأخر واذا اتأخر بيتاخر 5 دقايق بالكتير (طبعا ده فى عهد الوزير المحترم عصام شرف قبل م يخربها منصور شيفروليه)
وطبعا كنت حاسب حسبتى انه حتى لو اتأخر هيتأخر 5 دقايق وموقف الأتوبيس جنب محطة سيدى جابر ( قبل مينقلوه محرم بيه)وكده كده هنلحقه ان شاء الله
لكن

حدث مالم يكن فى الحسبان
راكب اتخانق مع الكمسارى واخرو القطار 5 دقايق ونزلت اجرى من سيدى جابر على الاتوبيس ولقيته ماشى ادامى وجريت وراه لانى عارف انه محتمل انه يتعطل فى سموحة ( تبعد عن سيدى جابرنص محطة اتوبيس)وبعد مسافة من الجرى والشنطة معايا لقيت نفسى مش عارف الحقه فقلت خلاص ناخد اللى وراه
طيب ده بيقوم 6 اللى وراه بيقوم كام

سألت فى المحطة فقالو 7
قلت ياواد فرق ساعة زى بعضه م انت عامل حسابك فى الوقت
لكن فوجئت ان اللى قبله سريع بيطلع اسكندرية مطروح بدون م يفوت على الموقف فى محرم بيه ولا بياخد استراحة وبياخد 3 ساعات فى الطريق
لكن اتوبيس 7 بيروح الموقف بيقف فيه ساعة الار بع وبيريح فى السكة فى كافتيريا فى الضبعة بياخد فيها نص ساعة
جزيت على اسنانى من الغيظ وسكتت
وبدل م اوصل مطروح 9 بالليل وصلت 11 ونص وطبعا على م خلصت شغل بقت الساعة 2 واخدت تاكسى وجريت على موقف الاتوبيس وبسأل على اتوبيس الساعة 2 اللى بيطلع على القاهرة فقالو مشى ومفيش غير 7 صباحا بعد كده
طبعا بقى أمر واقع وفضلت ملطوع فى المحطة لحد 7 صباحا
ثم كانت المفاجأة فى اكتوبر معاد 7 صباحا مبيطلعش المحور وانما بيدخل شارع الهرم (طبعا لو ركبت اتوبيس 2 كنت وصلت التحرير 6 ونص صباحا لانه بيدخل المحور ومبيريحش) لكن معاد 7 بيريح على كافتيريا فى السكة نص ساعة ودخل شارع الهرم وبقى يعك ويعجن فى الطريق لميدان الرماية ثم فى شارع الهرم والزحام فى الهرم رهيييييييب ووصلنى ميدان التحرير 3 ونص العصر
هل حد ممكن يصدق ان 5 دقايق تفرق فى العودة 9 ساعات كاملة ؟؟؟؟؟؟!!!!!!!!