[Injection]

قعدت أفكر وأتفلسف من يومين كده, وبعيدا عن مشاكل الدولة الداخلية جه فى دماغى سوأل, هل أحنا افى أمان؟

بداية قبل ماقول أى حاجة هقول لاقدر الله:-

بس لو حصل زلزال ولا حاجة, هنروح فين, وهنستخبى فين, وأنتم شايفين البلد عاملة أزاى لو عمارة وقعت الباقى هيقع وراها زى الدومينو, وأحنا لا عندنا مكان نستخبى فيه ولا بنية تحتية ملائمة, وأيران خير مثال.
الأحتمالت قليلة, بس فى 92 الدنيا أتبهدلت.

طب ولو حصل حرب بينا وبين أى دولة, أو حتى هجوم مفاجئ علينا, هنستخبى تحت السراير ولا أيه, والملايين اللى هتموت لو دخلنا فى حرب, ولا فيه أسلحة مع المدنيين ولا حاجة, وغير كده فى تعتيم رهيب على الجيش وأمكانياته ومفيش معلومات عنه ألا بطلوع الروح.

أنا هتجنن, أحنا واخدين حاجات كتير كمسلمات, يعنى بتفتح الحنفية بتلاقى مياه, بتفتح البوتجاز بتلاقى غاز, وبتنزل تلاقى العربية واقفة وأحيانا كمان سليمة, وممكن تشترى أكل من أى حته وتلاقى اللى أنت عايزه.

ولو حصلت حرب مدنية أو عصيان عام والناس بقت عمالة تكسر فى العربيات والمحلات وتسرق وتحرق, هنعمل أييييييه.

بلاش لو حصل وباء , والناس بقت خايفة وعمالة تستخبى, وبلدنا ماشاء الله قمة النظافة, من أتوبيس النقل العام لحد الميكروباص, فاكرين الطاعون فى أوروبا والناس اللى كانت بتنقل المرض لغيرها علشان فاكرين أنهم كده هيخفوا, ولا الجدرى اللى مالهوش علاج لحد دلوقتى وأختفى من العالم بسبب اللقاحات, وموجود فى معامل أمريكا وروسيا, مفيش حد محصن منه دلوقتى يعنى مرض بدون علاج لو أنتشر هيعمل أيه ( بينتقل عن طريق الهواء والتلامس والسوائل الجسدية ألخ )

معلش البوست دمه تقيل, بس فعلا هل أحنا فى أمان ولا أحنا متوكلين على الله من غير حتى ما نعمل اللى علينا, ولو حصلت حاجة من دى أيه اللى هيحصل للبلد وبنيتها التحتية, تخيلوا حتة زى عزبة النخل أو دواخل المطرية هيحصل فيها أيه والناس اللى هتموت قد أيه.

وربنا يحفظنا.