[خالدخليفة]

عندنا فى منطقة المطرية ولد ظريف ومباحث المطرية عارفاه
ده اسمه نفس اسمى الثلاثى بالظبط
وده عليه 45 قضية كلهم سرقة كهربا (ولا اللمبى فى اللى بالى بالك عليه 26 قضية سرقة كلهم ضد عمه)
ولما دورت فى الموضوع اتضح لى ان بسلامته بانى بيت فى المطرية والعدادات موقوفة ومش عارف يدخل كهربا وهو بانى بيت جنبه فيه كهربا
وكل شوية يوصل سلك كهربا من البيت ده للبيت ده و كل شوية تيجى مباحث الكهربا تقبض عليه وتشيله قضية
وانا مكنتش عارف الموضوع ده لحد اليوم اللى اتقبض عليا فيه يوم م اتخانقت مع الراجل بتاع امن الدولة فى قطار اسوان (صفحة11 فى هذه الذكريات)ورحلونى قسم الزيتون وهناك كشفو عليا بالكومبيوتر ووجدو 45 قضية سرقة الكهربا دول
كهربة ايه ياخواننا
المهم فيييييييييييييييييييييييي ييييييين على م اثبتت انى انا خالد الرحالة مش خالد بتاع سرقة الكهربا
والنكتة الأعجب لما اخدونى من قسم الزيتون للمديرية علشان الاحكام بتاعة الواد ده
سألنى امين الشرطة هناك /اسم امك ايه (قالها بغتاتة )
فقلت ليه
فقال انت هتحقق معايا علشا ن نسجله هنا وميقبضوش عليك تانى بسبب تشابه الأسم بينك وبين الواد ده فالفرق بينكم ان اسم الأم مختلف
بينى وبينكم العرق الصعيد نقح واتكسفت جدا اقول اسم امى فقلت /
اسمها ام خالد
فقال انت هتهزرمعايا
هتقول اسمها والا اكتب تقرير انك صاحب القضايا دى
فقلت اسمها ومشيت
المهم فى يوم دخلت فندق ابو الوفا فى سوهاج واخدو البطاقة يصوروها وفوجئت بيهم غاااااااااااااااااابو جدا قبل ميجيبو البطاقة واتصلت بالاستقبال فقال يابيه بنصورها فقلت كل ده
فقال مهو لازم نكشف عليها فى مديرية الأمن حضرتك راجل محترم لكن فى غيرك بيكون عليهم قضايا وهاربين منها
وانا افتكرت صاحبنا ونسيت موضوع اسم الأم اللى كنت سجلته
وقلت بس ياحلو هترجع مصر على حساب الحكومة
ومرت ربع ساعة كأنها 4 سنين
وفجأة
الباب خبط فتحت لقيت موظف الفندق ومعاه واحد شكله غلط
وانا نافوخى سخن وابتديت افكر فيماوراء الاحداث واتصرف ازاى
المهم ابو شكل غلط بص لى وقال
انت خالد
بلعت ريقى بالعافية وقلت /ايوه انا
فقال تانى مرة متسيبش الموبايل بتاعك فى الاستقبال وتمشى لان موظف الاستقبال لقاه واداهولى بس هو افتكر انك انت الوحيد اللى كان معاه موبيل
كان موبايل اريكسون 688 كنت شاريه ب 1750 بعد م عملو عليه عرض خاص
بس كان لذيذ لانه كان شبه القبقاب وكنت بضرب بيه العيال لما يتخانقو قبل ميموت عمر وتفضل سلمى
المهم انا بلعت ريقى واخدت نفس عميق وحمدت ربنا انى هروح على حسابى مش على حساب الحكومة