[خالدخليفة]

اثناء بطولة الأمم الأفريقية فى 2008 كل مباراة لمصر
مصر تكسب تانى يوم تلاقى جميع اسعار السلع الغذائية الرئيسية زادت
وفى شهر البطولة المبارك ( وده غير شهررمضان المبارك وغير حسنى مبارك)
زادت اسعار الزيت من 5 جنيه اللى 11 جنيه
والارز من 1,50 الى 3 جنيه
والصابون اعتقد زاد ربع جنيه القطعة وهكذا
المهم كالعادة راكبين القطار ولقيت واحد بيكلمنى وزعلان جدا بيقول الاسعار عمالة تغلى بشكل رهيب فانا قلت له بهدوء وفلسفة أحسد (اتحسد) عليها / مش انت اللى ساكت تبقى موافق شيل بقى يامعلم ولقيت واحد ثورجى قام وزعق بأعلى صوته / ياشعب مصر كفاية سكوت بقى هتفضلو خرفان لحد امتى قومو وثورو وكلمتين حنجورى (من الحنجرة يعنى) على رأى الكاتب الساخر محمود السعدنى وكان يقصد بالحنجورى الكلام اللى طالع من الحنجرة بزعيق وهو ولا له قيمة
المهم
الراجل اللى كان بيشكيلى حس نفسه انه وقع فى مطب واحد زقه(انا زقيت الثورجى على الكلام يعنى) والتانى عامل ثورة راح مطلع وشه من الشباك وعمل نفسه مش معانا
ولقيت صاحبنا الثورجى بص له وقال بزعيق
انت ياجبان انت خفت والا ايه خليك خايف واشرب من البحر وقعد يقول خطبة عصماء
وفجأة لقيته بيقول
احنا لازم نعمل حاجة ومش هنسكت تانى
وانا قلت ف سرى يخرب بيت فقرك انت هتحاكم القطار كله رغم انك بتتكلم صح
المهم فضل يهيص لحد بطاريات نافوخه والحماس فضيو
ولقيته عرقاااااااااااان وبيترعش
فانا بقول
ايه ده ياعم
فقال بلد جبناء وانا هتصرف
فانا مرضيتش اسأله هتعمل ايه احسن يقول حاجة فى وسط الحماس تتحسب عليه وانا عارف ان القطار مليان عصافير بتبلغ اول بأول نبض الناس وتنقل بالصوت والصورة احيانا
واحنا فى مصر بعد م نعرف نبض الناس بدل م نحل مشكلاتهم بنخنقهم ونقبض عليهم
فسكتنا شوية واخد نفسه وبعدين لقيته بيسالنى ويقول مش هتسألنى انا هعمل ايه
فانا اتغظت وقلت ف سرى
ايه ده انت عايز تتحبس وخلاص
فقلت له لا مش هسالك
فقال ليه فقلت / مش عايز اعرف ( مرضيتش اقول له انى خايف عليه نوصل بنها يتاخد من قفاه )
فاتغاظ من كلمة مش عايز اعرف
وبص لى بصة نارية وقال
انت جبان زيهم
فقلت / متشكر
وهتعيش وتموت ندل وذليل
انا / متشكر (مهو انا خايف عليه وهو مش فاهم )
مفيش دقيقة بعد الشتمتين اللى اخدتهم
ولقيت واحد بيقول له / تعال عايزك
فقلت له / عايزه ليه فقال نزل فيك شتيمة وشتم واحد تانى وانا هنا من شرطة القطار ولازم احافظ على الأمن والنظام
فانا قلت / لا ياشيخ وانت من شرطة القطار والا امن دولة وغيرت الموضوع
علشان ينسى صاحبنا وقلت
فى فرد امن دولة يكشف نفسه كده المفروض انك تبقى مجهول علشان منعرفكش وتركب تانى وسطينا مش تكشف نفسك وهو بتليفون صغير تخليهم يقبضو عليه معتقدش انك أمن دولة ولاشرطة القطار وانت كبيرك بتهزر او عسكرى واقف على باب قسم السيدة
وهرجنا ونزلنا بنها وقلت لصاحبنا اعمل معروف اعمل ثورة زى م انت عايز بس متزيدش عن 5 دقايق ومتسوقش فيها
فبص لى
وقال

















جبان
وسابنى ومشى