[خالدخليفة]

نكمل ومنتظر تعليقاتكم
ومعلش الحكاية دى للكبار اوى اوى فقط (يعنى فوق ال50 وانت طالع )

مرة ركبت القطار فى الدرجة الاولى من أسوان المهم كنت قاعد فى آخر العربية (الحجز جه كده)
وبعد شوية وصلنا بلد اسمها ادفو و دى من البلاد السياحية الجميلة بجد
ركب واحد ومعاها واحدة شكلها و طريقة لبسها يقولو انها رقاصة او مساعدة رقاصة حاجة كده
قلت بس قبل مصر هنلاقى مباحث الآداب قلبت القطار كله بسببها
وشوية ولقيت صف من صفين اللمبات اللى منورين القطار انطفى وبقى صف واحد
وفوجئت بصاحبنا مسك الهانم وهات يا.............. (تفعيص) ولا كأنها المدام وهما قاعدين فى البيت مش فى القطار
المهم انا اتغظت ودمى غلى فروحت لرئيس القطار وجبته وقلت النور هنا مطفى ليه فقال
اصل الباشا مش عايزه وانا اكنت بدور على الجملة دى قلت باشا ايه اللى مش عايزه االقطار ده ملكية عامة يعنى انا لو مش عايز الصف التانى هتطفيه قال لا قلت اشمعنى فسكت
وحصل الجزء التانى اللى كنت مستنيه الباشا حشر نفسه وقال انت مالك قلت له / لا ده مالى ومالك ومال الناس دى ده مال دولة واحنا اصحابه ( وحتتين قانون دستورى من اللى درستهم فى الجامعه )
وحصل الجزء التالت اللى كنت مستنيه الهانم مساعدة الرقاصة تدخلت وقالت / وانت متضايق ليه فقلت لان فى ركاب مش منضبطة بتستغل النور المطفى
فقالت ده خطيبى فقلتلها ده لو جوزك مش خطيبك ميصحش يحصل كده فى البيت ادام الاولاد مش فى القطار و ادام الناس
وهنا على صوت صاحبنا وقال انا هخرب بيتك واربيك قلت له لما تبقى تربى نفسك انت واللى معاك ابقى اتكلم عن التربية
المهم حصلت هيصة والناس اتدخلت وطبعا انا فضحته وشردته والناس تعاطفت معايا وهاجموه
فقال بعد م الهيصة راقت والمولد انفض / هوريك وهعرفك انا مين فبصيت له وقلت له انت كداب
المهم دخل بينا القطار الجيزة وشايفه بيعمل كام تليفون من ماركة انا عايزكو تستنوه وتعملو وتسوو
طيب انا بذكائى الصعيدى الخارق مش انزل الجيزة واركب المترو وانما ابدا كملت للقاهرة
وانا نازل فى القاهرة لقيت دولابين كبار واقفين ادام باب القطار وفيهم واحد بص لى و هز دماغه بالموافقة وانا بصيت ورايا ولقيت صاحبنا ورايا وفهمت انى فى حركة بتتعمل ولسه هرجع لقيت واحد منهم مسكنى من كتفى وقال لو سمحت عايزينك فى كلمتين فقلت خير قال /
احنا من أمن الدولة وربطو عينى وطلعو بيا على المبنى بتاعهم فى مدينة نصر اللى فى الحى السادس دخلت على واحد فى مكتبه وقال/ فك الرباط فكيته وبعد اسمك وسنك والديباجة قال قل لى بصراحة قلت خير انت نشاطك ايه فقلت عطور قال انت بتهزر قلت لا ده شغلى وتجارتى فعلا قال انا بتكلم مابعد الشغل من زمايلك ومتحاولش تنكر فقلت انكر ايه اصلا فقال انت متهم بمحاولة انشاء تنظيم سرى يدعو الى تحقير الأخر وتغيير نظام الحكم بالقوة فانا واكمننى دارس قانون فقلت له / اللى يقول الكلمتين اللى فاتو دول وكيل نيابة مش سعادتك فقال انت هتصاحبنى ياكذا وهتعلمنى شغلى فسكتت وبعدين افتكرت فقلت له ياباشا دى مشكلة عادية فى القطار و اذا كان الظابط ده زميلكم فالمفروض ان هو اللى تتكلمو معاه مش انا فعمل عبيط وقال قطار ايه وظابط ايه ومشكلة ايه احنا فى التنظيم اللى انت مؤسسه قلت له تنظيم ايه ياباشا المهم بعد تحقيق اخد اكتر من ساعة قال خدو ولقيت نفسى فى زنزانة عبارة عن حمام بلدى مبنى حواليه حيطة يعنى طول النهار واقف فوق قاعدة الحمام واحاول افهم من العسكرى اللى واقف على الباب وبينى وبينه مترين مفيش مبيقولش حاجة وقلت له بعدد يومين جعان فاتلفت حواليه وقال هات 5 جنيه (من 10 سنين ) ولقيته غاب ربع ساعة وجاى وف ايده رغيف فول بقول له ايه ده قال هو النظام كده كلته وسكتت جيت بالليل فقال مفيش هيا مرة فى اليوم تانى يوم نفس الفيلم تالت يوم نفس الفيلم وفهمت ان ده فيلم معمول بالقصد مش العسكرى بيتصرف من وراهم لان المبنى كله مراقب بكاميرات لدرجة انى كنت لما بعمل حمام كنت بنكسف جدااااا لانى فاهم ان الحمام اللى انا محبوس فيه متراقب
فيييييييييييييييين بعد اسبوعين رحلونى الى القسم الى انا تابع له (قسم الزيتون) وانا ماشى عديت على الباشا اياه اللى حقق معايا وقال احنا هنراعى انك مسئول عن اسرة وهنسيبك (اونطة طبعا لانه لو شاكك فيا 1% مكانش سابنى) فانا قلت كتر خيرك
ومشيت على قسم الزيتو ن كل ده واهلى مش عارفين عنى اى حاجة ووصلت القسم
كل اللى يدخل طبعا بيحصل معاه استقبال فلقيت واحد جالى وقال انت جاى منين قلتله من امن الدولة وتهمتك ايه فقلت انشاء تنظيم سرى فقال يانهار اسود ربنا يكفينا شركم المخدرات ارحم ياعم وقاطعونى ومبقوش يكلمونى وخايفين منى
وخرجت من القسم ووالدتى الله يرحمها كانت لسه عايشة ولما سالتنى وحكيتلها فضلت تبستف فيا /وانت مالك انت وراك بيت وعيال ومراتى قالت نفس الكلام وقالت يعنى العيال دى تروح فين وكان عمر ابنى الله يرحمه لسه عايش وقال (وهو مش فاهم حاجة لكن من سماعه للكلام حواليه كان عنده 4 سنين وقتها ) يابابا الناس دول وحشين متتكلمش معاهم تانى
بصراحة كلمة عمر معرفتش اطنشها لانى بربيه فقلت له / يابنى لازم تقول الحق ولو على رقبتك مينفعش انك تسكت
لكن بعدها باسبوعين بعد اعصابى مهديت كل م افتكر بتوع المخدرات اللى خايفين منى اقعد اضحك واضحك واضحك ( أما بلد فى غيبوبة صحيح )