الشكاوى الفلصو
بسم الله الرحمن الرحيم
الغرض من الموضوع تنبيه العملاء أو بمعنى ادق اللى خبرتهم قليلة فى السيارات و فى الغالب بيكونو شاريين العربية جديدة و الموضوع ده بيضم عدة شكاوى بتضايق العميل و هيا أصلا طبيعية بس يا رب أفتكر كل الشكاوى الوهمية عشان اوفر عليكم القلق و كمان السؤال فى التوكيل عنها
1- صوت عند بداية تشغيل التكييف و كل شوية يظهر و يختفى
الإجابة بكل بساطة ان ده الكلاتش الخاص بالكمبرسور . التكييف لما بيشتغل الكلاتش بيلقط فبيعمل الصوت ده و لما الهواء اللى داخل السيارة بيبرد التكييف بيفصل لوحده و بعد كدة بيرجع يشتغل تانى لما الهواء بيسخن و بالتالى الصوت بتاع الكلاتش هيحصل تانى
2- صوت تزييق مع الفرامل
فى الغالب العربية بتكون أوتوماتيك لما تدوس فرامل و تجيب D او R و تسيب رجلك براحة من على دواسة الفرامل بتسمع صوت تزييق و ده طبيعى عشان القاعد بتاعت المحرك و الفتيس بتريح( القواعد كاوتش)
3- صوت عالى مع الفرامل
و ده بيكون فى الغالب جهاز ال ABS
4-صوت عند كسر الدريكسيون على الأخر
ده بيكون نتيجة ان ضغط طلمبة الباور مش لاقى مكان يروح فيه العلبة (علبة الدريكسيون) مفتوحة على الأخر و الصوت ده طبيعى
5- صوت عند الدوران ودخول منحنيات على سرعة فى أرض غير ممهدة
و ده بردو مفيش اى مشاكل منه عشان بيكون فيه نسبة بوش فى علبة الدريكسيون فى سيارات كتير جدا و على سبيل المثال الانسر و كمان البى ام ال E39
6-, و انا واقف فى اشارة و مشغل التكييف و معشق على ال D دواسة الفرامل بحس انها بتنزل لوحدها
ده بردو بسبب فصل التكييف و تشغيله و بالتالى عدد لفات المحرك بتقل و تزيد و طبعا الفرامل ليها علاقة بالمحرك عن طريق السيرفو اللى بياخد الخلخلة من المحرك
كله كوم و الشكاوى اللى بتكون نتيجة اصوات الساعة 2 فجرا فى جراج مقفول و يتسمع فيه دبة النملة
يا رب أكون افتكرت كل الشكاوى و بالطبع ده ما يلغيش انك تسأل فى التوكيل عشان تطمن و تطمنا معاك
أتمنى ان الموضوع يعجبكم و لو افتكرت حاجة تانية هضفها
__________________
شارك دافع عن أفكارك
التعديل الأخير تم بواسطة Nissan ; 19-07-2010 الساعة 11:26 PM
|