[ahmedraafat00]

السلام عليكم

انا هعرض موضوع يا جماعه من اكتر المواضيع اللى بتسبب لى مشاكل وهيا انى اشوف مكان أركن فيه العربيه
ولو دلوقتى اى واحد مننا راكن قدام محل هل فعلا من حق الراجل صاحب المحل انه يقولك ابقى غير مكانها اصلها قافله على الفترينه
يعنى دلوقتى انا واحد ساكن فى شارع كل المحلات اللى فيه محلات موبيليات
و كل ما اركن فى حته لازم ببقى راكن قصاد محل و بالتالى صاحب المحل يقولى اصل العربيه كده بتسد عليا طب ياريت مطولش عن يومين . طب ياعم انا مش بنزل بالعربيه كتير اعمل لسيادتك ايه؟؟ حاجه غريبه
أنا قدام بيتى مثلا محل موبيليات و الراجل ما شاء الله ربنا فاتح عليه و فاتح بتاع خمس محلات على بعض "اللهم لا حسد " يعنى هو كده واخد رصيف كامل و انا بقى لما اجى اركن اتفادى انهى فاترينه من الخمسه دول ؟؟؟؟
من ضمن المواقف انا مره ركنت قدام باب عماره المفروض انها بعد اخر فاترينه للراجل ده "وانا مش بتكلم عليه شخصيا انا بتكلم عن اى صاحب محل فى الموقف ده"
المهم بعد ما ركنت كنت سايب العربيه اربع ايام و مرتاح بقى و قولت انى كده مش مضايق حد لدرجة انى كنت متوقع الراجل يشكرنى انى مراعيه و متابع لحد ما لقيت مكان فاضى بعيد عنه عشان اريحه "واللهى كل شويه كنت بطلع البلكونه مستنى المكان ده يفضى "
فوجئت فى يوم نازل اجيب حاجه من السوبر ماركت انه بينادى عليا "يا استاذ ينفع كده برده " انا الصراحه زهلت ده بدل ما يشكرنى "فى ايه يا حج " " العربيه واقفه باقلها اربع ايام كده وساده عليا " " يا سيدى انا راكنهالك قصاد العماره و سايبلك الفترينات بتاعتك و محلاتك عشان مسدش عليك حاجه " يرد يقولى" اصل احنا بنخزن بضاعه فى مدخل العماره "
طب بجد انا اعمل ايه؟انا مش عايز اعمل مشاكل مع حد انا مش بتاع خناق و مشاكل وبعدين انا خلاص تعبت و دورت فى كل الجراجات اللى عندنا فى محطه الرمل فى الاسكندريه و للأسف كل جراج من دول مليان على اخره
بس انا عندى سؤال اخير :
هل من حق صاحب المحل انه يعترض خصوصا انى عربيتى شيروكى يعنى برده كبيره و بتسد عليه و لان انا قليل لما بنزل بيها فا بالتالى بتقف كتير ؟
طبعا قانونا مش من حقه لان الشارع ده للمنفعه العامه بس هل ممكن تكون الاعراف السائده دلوقتى كده و احنا مش عارفين !!! بجد حاجه تحير
انا اللى شجعنى على كتابه الموضوع لانى واثق ان فى ناس كتير بيحصل معاهم المواقف دى يوميا و اتمنى مكنش طولت عليكم