[TELEBK]

والله ياجماعة فيه موضوع حابب أتكلم فيه وعايز مشاركاتكم ، وهوه إني من ساعة ماإشتركت في المنتدي بقالي حوالي 5 شهور وأنا حاسس إن فيه رابطة جامده جدا كل يوم بتزيد مابيني ومابين المنتدي وأعضاءه ، حاسس زي مايكون إن إحنا أسرة واحده كل واحد فيها عارف التاني ومتلهف علشان يقرأ له حاجة أو يعرف أخباره أيه ، حاسس زي مايكون ليه أخوات جداد ظهروا فجأه ، كل واحد عايز يعمل أي مشاركة تكون مفيده علشان يحس بتضافر الكل عليها وتشجيعة ليها .
عندي شعور جامد جدا إن كل واحد فينا بيبقي فيه وقت معين من العمر محتاج فيه حاجة جديده تحصل له علشان يحس إنه عايش ، يعرف ناس جديده ... يروح أماكن جديده .... يمر بتجربه جديده ، يعني نوع من التغيير والروتين الحياتي اللي أصبحنا متعودين عليه ، ويمكن ده أنا حسيته في مصر موتورز ، بتعليقات أعضائها الجميلة والمحترفة والظريفة ، كل واحد شخصيته بتظهر من خلال تعليقة وعرض وجهة نظرة ، وده بيعمل رابطة قوية بين أعضاء المنتدي ، المقابلات والرحلات واللقاءات كل ديه بتكون نوع الود والترابط بين الأعضاء وخصوصا إن أجمل صفة في المنتدي ده إنه مش بيهدف للربح المادي ، لكن بيهدف للربح المعنوي .
فيه كلام كتير جوايا بس مش عايز أطول عليكم ياريت كل واحد حاسس بشعور جميل ناحية المنتدي والقائمين عليه وأعضاءة يكتبة ،وديه بتكون دفعة معنوية جميلة ورد للجميل لكل واحد موجود فيه ، وفي نفس الوقت المنتدي ده يكون قدوه لكتير من المنتديات في أحترامة لنفسة ولأعضاءه .
مع خالص شكري وإمتناني وتقديري
د / خالد