رد: الطريق من القاهره الى مطروح وعايز حجز مصيف
المشاركة الأصلية كتبت بواسطة mido-spicy
اولا تروح وترجع بالسلامه مقدما
ممكن اسافر ازاى
انا مش عارف انت من انه محافظه علشان اوصفلك تروح ازاى
بس لو انت من القاهره هتبتدى من الدائرى او من شارع الهرم لغايه ما توصل بوابه مصر اسكندرية الصحراوى
بعد حوالى 150 كيلو من البوابه هتلاقى الرست هاوس على الطريق وبعدها بحوالى 5 كيلو هتلاقى يافطه مكتوب عليها طريق وادى النطرون هتلف مع الدوران للخلف وتاخد اول يمين يقابلك وهو دا طريق وادى النطرون وعامل حوالى 130 كيلو فى اخره هتلاقى فى وشك بوابه مارينا 2 هتدخل فى طريق الساحل مع اخر طريق وادى النطرون يمين اجبارى وهتلف من اول لفه علشان تبقى مارينا على يمينك وتاخد الطريق علطول لغايه ما توصل مطروح ان شاء الله ومن مارينا لغايه مطروح حوالى 170 كيلو
واخلى بالى من ايه وامشى على سرعه كام
هتخلى بالك من ان اخر حوالى 90 كيلو قبل مطروح الطريق وحش شويه
وكمان فى طريق مصر اسكندرية الصحراوى بيعملوا طريق جديد وفيه بتاع اربع تحويلات للطرق ماتقرصش بالعربية جامد لانك بتلاقى الطريق قفل ادامك مره واحده
اما سرعه كام فالمقرر 100 كم كحد اقصى بس بالليل ممكن تسرح شويه وخد بالك ان الطريق كله من 6 الصبح لغايه 8 المغرب مرشق كماين ورا بعض
واين افضل مكان احجز شاليه او شقه فندقيه وانسب الاسعار
الموضوع دا حسب امكانياتك عموما هى البلد صغيره وهتلاقى فيها شقق كتير
بس هو المناطق المعروفه هناك هو السوق اللى فى شارع اسكندريه ومنطقة العوام والليدو وشارع اسكندريه نفسه وطريق الكورنيش الجديد والمناطق دى هتلاقى فيها شقق كتير
اما الفنادق هتلاقيها كلها على البحر زى فندق ريم - القصر - الخليج الازرق - الليدو
واعتقد ان الفنادق دى كلها 3 نجوم
اما لو عايز حاجه اعلى فيه فندق فى الابيض 4 او 5 نجوم بس الابيض دى بعيده عن البلد بحوالى 25 كيلو بس طبها برضه جوه مطروح
وفيه كمان قريه اسمها اندلسية جوه البلد ودى فيها شقق وشاليهات وممكن تحجزها عن طريق اعلانات الاهرام كل يوم جمعه فى باب عقارات للبيع والتصييف وفيها العاب مائية و3 حمام سباحه بس مافيهاش بحر
ورحله سعيده
|
الله يفتح عليك ، وصف رائع وجميل ، وأحب أضيف إن أول ما تمسك طريق وادي النظرون " العلمين " ، السرعة عليه 100 كم ، إوعي تجري في أول 15 كم منه أكتر من كده لإن فيه كاميرا رادار بتصور كل أي عربيه تعدي السرعة ديه " أنا إتروقت منها من 3 أسابيع - صورة تشرح القلب - فخد بالك " ، ونصيحتي ليك ماتحاولش تعدي السرعة المقررة لإن في النهاية حتلاقي فرق الوقت تقريبا نص ساعة ، ورحلة سعيدة .
د / خالد
__________________
د / خالد طلب
|