[medo akef]

المشاركة الأصلية كتبت بواسطة Injection أنا معاك فى أن نظام التعليق مهم جدا علشان ثبات العربية. بس موضوع الثبات موضوع كبير, بيأثر فيه عوامل زى "العفشة" والشكل الخارجى و توزيع الوزن جوه العربية. وناخد كمثال الفيرنا, موتورها قوى وخفيفة, بي ثباتها قليل جدا على السرعات العالية, نظرا للعفشة السيئة والشكل الغير أنسيابى. والمرسيدس والألمانى عامة وزنهم تقيل علشان الكماليات اللى فى العربية ووسائل الأمان اللى فيها, ده غير الخامات المصنوع منها الموتور والفوانيس ألخ, أنما عربية زى الفيرنا أكبر كماليتها زجاج بالكهرباء أكيد هتبقى خفيفة ولو لاحظت مرسيدس وبى أم بتعمل عربياتها لفئة معينة من الناس " الأغنياء" ودول بيبقوا عايزين كماليات كتير وسرعة, ومرسيدس بتضحى بجزء من الأداء علشان وزن الكماليات. وعربيات السباق بتتعمل من الكاربون فايبر علشان وزن العربية يبقى خفيف ويتحسن التسارع والسرعة القصوى والتحكم فى الملفات. فكرتنى, لو تعرف الg force اللى بتأثر على العربية, لو عندى عربية وزنها 2000 كيلو بتلف فى ملف, العربية هتتشد بعيدا عن مركز الملف و بيحصل ده طرديا مع وزن العربية(لما بتلف بالعربية وتلاقى نفسك بتتشد لبره), على عكس العربيات الأخف اللى الموضوع ده فيها بيقل فبتقدر تاخد ملفات على سرعة أعلى من غير العربية متتسحب لبره(مع عفشة سبور و تهبيط العربية للحفاظ على الثبات). وفى الفورملا وان, العربيات خفيفة وقوية جدا, والجنط مش تقيل ده خفيف بس مساحة تلامس الكاوتش مع الأرض وخفة وزنه هى اللى بتحدد الثبات. ده حتى لما تشترى جنط جديد مش مهم حجمه قد ما مهم يكون وزنه أقل من القديم, علشان الموتور يعرف يحركه بسرعة وكفائة من غير ماتجهد الموتورفى تحريك وزن الجنط التقيل. ودى صورة عربية واطية و أختلاف وجهات النظر هو اللى المنتديات أتعملت علشانه ياباشا ومعلش أنا طولت المرة دى أوى, أشوفك فى المشاركة الجاية.

تمام يا مان زي ما قلت لك الالماني بيقول امان اولا ثم اداء ثانيا
فعلا كلام حضرتك صح ان لو العربيه تقيله هترمي بعيد لكن لو خفيفه هتفضل في نفس الحاره لكن دا بردو حسب نظام التعليق و ممكن تجرب ده بسهوله جدا
نظام التعليق في لانسر 1.3 ملتي كل عجله لوحدها و ده طبعا بيكون متطور جدا في السيارات الفاخره و هو افضل من المتصل
و جرب لانسر 1.6 و هي عفشه رايضيه و متصله
احساسك في الاثنين
ال1.3 هتلاقي العربيه بتقرص علي المسعدين ذياده عن المعداد في العربيات العاديه شويه لان كل عجله شيله حملها لوحدها و العربيه مش هتحاول تروح منك في حاره تنيا
اما ال1.6 فتلاقي العربيه ثابته جدا لكن هتحس بأن الدركسيون بيرمي نفسه جامده الجهه المعاكسه
و طبعا موضوع نظام التعليق كبير جدا و الفرق بنهم اكبر مش عوزين نخش فيه
ممكن ان العربيه لما تكون خفيفه تكون مرنه معاك في الملفات لكن مش هتكون ثابته يعني كسره زياده شويه ولا شويت هوا جامد علي سرعه ممكن يضيع الدنيا و انا ضربت لك مثال الفورميلا ون
كانو يعملو جنط رفيع عشان يبقا الاحتكاك اقل يبقا اداء اعلي؟
لا بس لازم جنط عريض عشان يحولو يسدو العجز الي عملوه في الوزن بس بردو العربيه بطير و بتتقلب و بتعوم و لازم الي سيقها يبقا سائق محترف عشان يقدر يتحكم فيها
و بردو لو تلاحظ المني كوبر حجم صغير ثبات عالي وزن ثقيل!
مستحيل يكون في عربيه وزنها صغير و ثباتها عالي
و الفرنا مع انها هوا علي الطريق في ناس بتغرز بيها علي 160 و 180 دا لأنهم محترفين سواقه و فهمين العربيه زي الفورميلا ون لكن مع الناس العاديه مستحيل لعملو كدا طبعا
يعني الفكره الحقيقه الي هي رائعه و حضرتك اول واحد يقول لنا عليها اني اخفف الوزن دي لازم يعملها سائق محترف مش اي واحد عاوز يجري يعملها لان لو حد عادي عملها هنجيبه من علي شجره كفانا الشر
تخفيف الوزن يعطي مرونه لكن يفقدك ثبات
و بمناسبه السياره الوطيه انا عاوز عربيه وطيه مش عشان عوزها تبقا ثابته لا انا عوزها عشان نفسي اعدي من تحت عربيه نقل لاني بعربيتي اقصي حاجه بدخلها تحت النقل هي الكبوت اكثر من كدا هتفرم!
تمام يا مان اختلاف الرئي لا يفسد في الود قديه و اهو احنا بنتبادل معلومات
و اسف علي التأخير