[Injection]

الناس عامة بتقول أن اليابانى أفضل, لأن أجزاء السيارة معمرة وبتقعد كتير بدون تغيير بس قطع الغيار أسعارها متوسط ويمكن لبعض الناس غالى.
وفى ناس بتقول أن الكورى أحسن, لأنه معمر بس مش زى اليابانى وقطع غياره رخيصة وبتتباع فى أى حتة.
وعموما الموضوع حسب أستخدام الشخص للعربية, وأنا شايف أن الكورى واليابانى تقريبا زى بعض, وأنا أرشح لحضرتك الألنترا فى الكورى, عربية فخمة وجميلة وقوية وسعرها كويس.
أما اليابانى مفيش حاجة منتشرة أكتر من المتسوبيشى والهوندا والتويوتا وممكن نيسان, والأختيارات قدام حضرتك كتير.
ومش مهم بلد الصنع قد مامهم حالة العربية, لو حضرتك عجبتك عربية لازم تكشف عليها عند سمكرى وميكانيكى من أهل الثقة, وتكشف على كبس الموتور فى بنزينة نضيفة وترفعها وتبص على العفشة, والنصابين فى سوق المستعمل كتير و لازم حضرتك تاخد بالك كويس, و 80 الف مش مبلغ قليل, فلازم لازم تفحص العربية حتة حتة, علشان لو فيها حاجة غلط ما "تتدبسش" فيها والراجل مش هيرضى يرجعها, وممكن يرجعها بالناقص وياخد منك 5000 جنيه مثلا, ومعظم تجار المستعمل بيعتمدوا على كده.
وربنا يرجعك مصر بالسلامة.