الحمد لله يا باشا ازيك انت؟
ملحوظة بس يا باشا مفيش ابيزا موتور اسباني و مفيش سيات موتور اسباني سيات كلها بكل عربياتها و موديلاتها (مواتير-عفشات-فتيسات-شاسيهات)=الماني صناعة vw-audi
تمام كده
بالنسبة للابيزا 94 و 98 انت لو عايز عربية اقتصادية و في نفس الوقت معمرة و تعيش معاك هات 94 خصوصا مع غلاء اسعار البنزين ممكن تديها 90 عادي جدا مع انها انجكشن و 1000 سي سي و انجكشن يعني مش هتحس بالبنزين اساسا و ثابتة و جميلة جدا علي الطريق بس متنتظرش اداء عالي من الموتور لانه اساسا موتور اقتصادي بس سحبه حلو و هتعجبك
الابيزا 94 معشوقة الشباب بجانب الاسطورة جولف العربية دي الشباب بس هما اللي بيعرفوا يقدروها صح عربية مستفذه و لو سوقتها سواقه عادية هتعجبك عربية قديمة شوية اه بس في منها حالات نضيفة و كتير و هتلاقيها ناعمه و لذيذة جدا و ثباتها ممتاز و غير استهلاكية في قطع الغيار بالمرة و لو اهتميت بيها و حافظت عليها هتصونك و حتي لو بهدلتها زينا هتصونك برضه و ده سر تمسكي بيها
و الفرق بين الاتنين الابيزا 94 1300 و ال98 1000 و 94 كربراتير و 98 انجكشن و الاتنين سحبهم حلو بس 94 افضل في الشد و الجري و التحمل و الاعتمادية ال98 جامده و معمرة بس 94 افضل حتي لو انت غاوي شد و حرق نظام حقن الوقود هيستحملك و مش هيقولك لا و مش هتبقي قلقان زي الرشاشات في الانجكشن و قطع غيار ال94 ارخص و اقل استهلاك لقطع الغيار من ال98 و ال94 اسهل في الصيانة و الاصلاح و انا عن نفسي حافظها عن ظهر قلب و لو عندك اي استفسار ان شاء الله افيدك فيها
و لو عندك اي سؤال تاني اتفضل طبعا و لو تحب نفصص العربية سوا اسأل و انا اجيب