[alymonir]

السلام عليكم
واضح ان الموضوع دة قديم من أول ما بدأ المنتدى , بس أنا لسة شايفه
و بما اني اعتبرت نفسي عضو في هذا المنتدى ( بعد اذن المشرفين طبعا ) حبيت إن أنا أكتب عن عربيتي
أنا معايا سيارة تويوتا ايكو هاتش باك موديل 2000 لونها فضي
كان معايا قبلها فيات بونتو و كانت قرفاني في عيشتي جدا لحد ماخلصت منها ( مش عايز أتجنى على العربية لأني اشتريتها قصدي شربتها مستعملة )
بس أنا قررت عمري ما حاشتري فيات ولا ايطالي من أصله
المهم
أنا ارتحت جدا مع الايكو , سيارة جميلة ( مش شكلا طبعا ) عملية جدا , موفرة للبنزين , عاملة 200000 كم لحد دلوقتي و الحمد لله مابصرفش عليها اكتر من مصاريف الصيانة الدورية
مشكلتها بالنسالي إن موتورها ضعيف شوية ( احم احم نقدر نقول أوووييييييي ) 1000CC و خصوصا لما تشغل التكييف في الصيف اتفرج على سحبها
تحس ان انت راكب تريللا أو سيارة بمقطورة
المهم
زائد ان مافيهاش شنطة خالص ( تقريبا ممكن تاخد شنطة الشغل الصغيرة بتاعتي )
بس على الرغم من كدة فهي سيارة أكثر من رائعة
أنا بافكر حاليا أغيرها و أجيب الكورولا الجديدة بس مستني شوية لحد ما الظروف تتحسن
على العموم أنا ماليش طموح أكتر من كدة في الوقت الحال و كل مرحلة بظروفها
و لو ليا حلم في سيارة أكيد طبعا حايكون أي سيارة سوبر , فيراري , بوجاتي , مكلارين ( الحاجات الاقتصادية دي )
حاجة كدة 10000CC , ألف حصان , من زيرو لمية في تلات ثواني
يعني طالما حلم نحلم زي ماحنا عايزين
بس في الاخر الواحد كفاية ان هو حايتحاسب على اللي معاه ( و لتسئلن يومئذ عن النعيم )