[خالدخليفة]

الحقيقة انا حصل معايا موضوع وطالب منكم تقولو رايكم وايه المفروض التصرف الامثل اللى كان مفروض يتعمل


وبداية الحكاية كنت فى بنها من يومين الساعة 11 بالليل ومفروض اوصل حلوان فى اقل من ساعة علشان الحق واحد قبل م يـقـفل علشان اخد منه فلوس وطبعا خارج من بنها وفتحت البرجل ومفيش ادامى الا الطريق ومركز فيه اوى المهم واحد معاه لانسر جرى ورايا ودخل معايا سباق ونظرا لان عربيتى محولها غاز ومش غاوى سباقات فلم اهتم وكملت وطبعا لكن لانى مستعجل فجريت وهو ورايا لكن معظم بتوع السباقات اخرهم 10 دقايق ربع ساعة ويلمو نفسهم وانا ركبت الدايرى من قليوب وسبته
واول م ركبت الدايرى وابتديت اجرى لقيت عربية نوبيرا جاية تجرى ورايا فوسعت لها لكنها م جريتش دى راحت لازقة فيا وضرب النور العالى علشان يعمينى وماهتميتش لان مراية النيسان الداخليه فيها زرار بنزله يقوم ينقل النور على الكنبة اللى ورا فجريت فجرى ورايا ف اديت انتظار و هديت السرعة راح مهدى كل ده و هو ضارب النور فى المرايه وطبعا انا مستعجل واحنا على الدائرى ومفيش وقت اسئله بيعمل كده ليه
فروحت عامل غرزتين بين العربيات لقيته ورايا ففهمت ان دول عيلين بغتتو وده تهريج سخيف
روحت ناقل العربية من غاز لبنزين فوصلت السرعة 180 وطبعا بعدت عنه بكتيييييييييييير
و لما غاب عن عينى نزلت السرعة تانى ووصلت 120 ونقلت العربية للغاز وامعانا فى البعد عنه مسكت اليمين ولقيته جالى تانى ففهمت ان دى رخامة
ونظرا لان الصعايدة حقهم ميباتش ومحدش يعرف يتراخم عليهم
روحت ناقل العربية للبنزين مرة تانية واخد اكتر من 5 غرز زجزاج بين العربيات علشان اتوهه فلقيته غامر بنفسه وعربيته و جرى ورايا ولولا انى مستعجل كنت قلت له عيب اللى بتعمله او اتمشيت على الاولانى لحد ميغور بعيد عنى
وقررت انى علشان اتخلص منه لابد من زنقته فى اى حاجة و قد كان
لمحت تريلا على يمينى ووراها ميكروباس بيدى اشارة شمال علشان يدخل ادامى روحت قارص وصلت العربية 170 كيلو طبعا بعدت شوية عن صاحبنا وكلاكس طويل للميكروباس راح معدينى صاحبنا جاى ورايا جرى كان الميكروباس دخل ادامه
وسمعت صوت فرملة عاليه جداااااااااااااااا وببص فى المرايه
لقيته واقف بينه وبين الجنب الشمال للميكروباس سنتيمترات قليلة جدا وربنا ستر لان لو فرامله ضعيفة شوية صغيرين كان اما لبس فى الميكروباس ومع سرعته العاليه كان طار من فوق الدائرى على دماغ الناس تحت والميكروباس طار وطبعا كانت ماتت فيها ناس
الحقيقة انا لما شوفت الموقف فى الاول ضحكت لانى عرفت اتخلص منه وخاصة انه كان لازق لى بطريقة بايخة
لكن لماقعدت مع نفسى فهمت ان الشيطان ضحك عليا وخلانى اضحك لكن ده شروع فى قتل ولو حصلت الحادثة دى كان هتموت فيها ناس وهتتعور ناس ملهاش ذنب غير انى اتخلصت من رخامة واحد فجات فيهم
بس برضه مش عارف كان مفروض اتصرف مع ده ازاى وانا مستعجل وعايز الحق مشوارى وده بيرخم عليا
والحقيقة ضميرى واجعنى بقى لى يومين ومش قادر اركب العربية وكل ماركبها اشوف المنظر وهما واقفين وبيتخانقو وانزل منها تانى لان لو كان حصل لهم حاجة مكنتش هسامح نفسى ابدا
طيب كان مفروض اتصرف ازاى مع الرخم ده وانا مستعجل واحنا على طريق سريع مش هينفع نقف وبسلامته كل م امشى يمشى ورايا واهدى يهدى واجرى يجرى
طيب اعمل ايييييييييييييييييييييه


ملحوظة صغيرة
بدأت هذه المطاردة التى لا اعرف لها سببا حتى الأن غير التهريج والرخامة من طلعة الدائرى عند غبور بين قليوب وشبرا وحتى مطلع محور المريوطيه اى بمسافة لاتقل عن 35 كيلو وانا صابر عليه