السلام عليكم يا اهل المنتدي ptmnlo123per122
بقالي كتير مكتبتش مواضيع و الكتابه وحشتني و كنت عايز اعمل الموضوع ده من مدة بس اتشغلت شوية و لما افتكرت قلت اعمله عشان لو حد عايز يسأل في حاجة و اصحح بعض المفاهيم الخطأ عند بعض الناس اللي قريتها في المنتدي الفترة اللي فاتت
طبعا انتوا عارفين سيارتي المطحونه في شوارع مصر
ابيزا 94
الجنط الاوريجينال كان مقاس 14 و الكاوتش اللي كان راكب كان 175/65 ..
و في رحلة تظبيط العربية بعد ما ظبطت العفشه و قمت مغير طقم دبرياج كامل ديسك و اسطوانه و بليه و سلك دبرياج و عملت صيانه للموتور و الحمد لله العربية اتظبطت جامد و سحبها بقي ممتاز و فرقت عن الاول كتير ..
طب انا عايز اخلي العربية حلوه برضه و انا من زمان عايز اجيب جنوط
فكرت كتير و كنت هشتري طقم جنوط مستعمل تايلاندي مقاس 16 و كاوتش 205/45 مستعمل برضه بس قلت الكوتش المستعمل مش مضمون غير ان 16 كتير هو مش كتير علي العربية عادي يتركبلها 16 و العفشه بتستحمل بس هيتقل الدركسيون و انا عربيتي مش باور !
قلت اجيب طقم 14 و اركبه علي الكوتش بتاعي و خلاص ! لقيت جنط bbs مقاس 14 و كنت هاخده ب 800 جنيه بس علي الطبيعه شكله مطلعش حلو و مش نيكل زي ما كنت فاكرو ..
و هنا تبدأ الحكايه
جروب علي النت لعرض اي شئ للبيع و اغلبه حاجات تخص العربيات لقيت جنط 15 8 مسمار يركب علي ابعاد الالماني و ابعاد الكوري او بمعني اخر يركب علي ابعاد 4*100 و ابعاد 4*114 ..
الجنط 6 ريش الريشه تخينه كده الجنط ده نفس الشكل ده بالظبط بينزل للاوكتافياa5 هي نزلت بأشكال مختلفه من الجنوط بس ده واحد منهم بس بتاع الاوكتافيا 5 مسمار و مقاس 16 ده 8 مسمار و مقاس 15 لكن الشكل هو هو بالمللي ..
عجبني اوي و لقيت علي النت صورة عربية ابيزا 94 بس race راكب فيها نفس شكل الجنط ده بلون ابيض و مقاس 17 بس شكله لايق عليها اوي ..
الجنط كان معروض ب 900 جنيه و ده اساسا سعر كويس ليه لان حالته كانت ما شاء الله ممتازة و في نفس الوقت ولا تايواني ولا صيني .. ده صناعة ماليزي و صلب جدا جدا ما شاء الله كل اللي فيه شوية خرابيش خفيفه في الشفه مش في الريش ..
اخدت رأي والدي و عارض في الاول شوية و قالي ملهاش لازمه بس الحمد لله وافق بعد كده ptmnlo123per122
عملت اتصالاتي مع صاحب الجنط و قبل اخر امتحان في الترم الاول من امتحانات السنة دي كنت جبت الجنط .. و كشفت عليه عند واحد بتاع كاوتش و قالي تمام الحاله و كله زي الفل ..
و الحمد لله خلصته بسعر حلو جدا اقل من اللي كان معروض بيه يعتبر الجنط واقف عليا ب 700 جنيه بالرينجات اللي عملتهاله عند الخراط ..
اخدت الجنط و اتفاجأت بحاجة استغلستها شوية انه عشان يركب لازم مسامير الانكيه مش مسامير عاديه
المهم عملت الرينجات عند الخراط و بتتعمل بالطريقة الاتيه:
باخد فردة جنط و اروحله بالعربية بياخد مقاس صره الجنط و صرة العربية و بيعمل علي اساسهم و مرضاش يعملهمش حديد عملهملي من بلاستيك مرن نضيف جدا .. و سبب عمل الرينجات هو الاتي : ان الجنط مقاس الصرة بتاعته بيببقي اوسع شوية من مقاس صرة العربية لانه مش الجنط الاوريجينال اللي هي نازله بيه .. فا الرينج بيتحط في صرة الجنط عشان يركب علي صرة العربية و يحكم ميقعش من علي الصرة و لو اي حد جاب جنط و معملوش رينجات الجنط مش هيبقي محمل علي صرة العربية لا هيبقي محمل علي المسامير شوية بشوية المسامير تتقطم و حصلت مع واحد صاحبي في عربية فيرنا ..
رحلة المسامير ..
سمعت ارقام غريبه و عجيبة ! كله يشوف شاب و معاه عربية و طبعا ده عيل فافي ابوه مديله فلوس عشان يركب جنوط سبور و يروش هاته نشتغله ! سمعت 15 جنيه في المسمار !! و 12 جنيه !! و 10 جنيه اخر واحد مسكته شوطته ابو 10 جنيه ده قلتله انت فاكر بتكلم واحد ملوش فيها المسمار جملته 3 جنيه عايز تديهولي ب 10 و انا هاخد 16 مسمار يعني ب 160 جنيه مسامير !! المبلغ مش كبير في حد ذاته لكن 160 جنيه عشان اشتري مسامير كتير علي مسمار يعني !!
نزلت التوفيقيه لحد ما عترت فيه عند واحد قالي 8 جنيه المسمار فاصلته قالي احسبهولك ب 7جنيه و نص قلتله شكرا و سبته و مشيت واحد بعده قالي 5 جنيه المسمار من هنا لهنا اخدته ب 4 16 مسمار و واحد احتياطي يعني 17 مسمار تايواني و المسامير نيكل مش اسود 17*4 = 68 جنيه !!!!!! و هو ده السوق المصري !! و معلومة المسامير هي هي عند كل اللي سالت عندهم مش صناعات مختلفه و كله نيكل بس لاحظوا فروق الاسعار برا التوفيقيه اقل سعر كان 160 جنيه للطقم !!
الحمد لله ربنا وفقني و عملت الرينجات و المسامير و جبت 4 بلوف نيكل و ناقص الكاوتش !
بريد جيستون turanza ولا بريد جيستون potenza ولا بريللي ولا اجيب ايه !! نزلت سألت علي الاسعار
turanza ملقتش منه المقاس اللي انا عايزو و هو 195/50
potenza و ده البريدجيستون الياباني و كاوتش ممتاز سعر الفرده بيوصل ل 700 جنيه يعني فردة بتمن طقم الجنط كله ptmnlo123per1106
بريللي ملقتش المقاس ..
واحد صاحبي ربنا يكرمه يا رب قالي تعالي و انا هظبطك عند واحد حبيبي ..
شركة الايمان في شارع التحرير بعد جاد بشوية علي نفس الصف بتاعه ..
قالي سيبك من البريدجستون خلاص زمنه انتهي مش لعيب فيه لكن لغلاء سعره بطريقه غريبه !! بس هو بصراحة كاوتش ممتاز و انا بحبه جدا !
قلتله مبدئيا لو طلعتلي اي فرده نقشة شجره ولا الكلام ده مش هاخدها مش عايز النقشه دي
قالي هديك كاوتش لو مشيت بيه في مياه و فرملت هيبقي اكنك ماشي علي اسفلت عادي .. طب ورينا يا عم ..
KUMHO ECSTA
اسم النقشة ecsta و هي نقشة المطر !
سعر الفرده 350 جنيه .. بالترصيص بالبلوف بالتركيب ..
النقشه حلوه بس انا معنديش ثقة في اي ماركة كوري .. و ده صناعة vietnam بصراحة مكنتش عايزه .. لكن محدش يعرف الخير فين دلوقتي انا بنصح الناس بيه !
والدي قالي حلو و بتاع و سبني اروح و اشوف راح و الراجل جبلنا فرده جديدة نتفرج عليها بصراحة النقشه جامده ! بس كوري كومهوptmnlo123per144
والدي بيقولي ها قلتله مش عارف انا مش مرتاح للكاوتش ده .. قالي اركن انت بقي و هي دي ميزة والدي بيعرف ياخد القرار الصح في الوقت الصح ptmnlo123per122 دفع و ركب و خلص و مشينا و كل ده و انا غضبان علي الكوتش ! طلعنا دائري غرز علي 140 العربية فارقه جامد و الكاوتش وازن العربية اوي و الدركسيون بقي انعم !
لحد ما جربت انا بنفسي بقي .. فرمله في رمل فرمله جامده علي سرعات 140-150 و فرمله في المياه
بصراحة ولا اروع !! حاسس اني مازلت مركب بريدجستون لان كاوتشي القديم كان بريد جستون !! الكاوتش بيمسك في الارض جامد و في الميه اكني ماشي علي اسفلت عادي !!
ربنا وفقني الحمد لله ..
نيجي لنقطه ان ناس كتير قالت ان الجنوط السبور بتبوظ العفشه .. انا ركبت يوم 5-2 النهارده 1-5 يعني داخل في 3 شهور .. العفشه محصلهاش اي حاجة ! بالعكس اللي حصل الاتي:
1-زياده الثبات بصورة ملحوظه خصوصا في الغرز علي سرعات ..
2-شكل احلي بكتير من الجنط العادي و الطاسات
3-العفشه محصلش فيها اي حاجة و لم يمسها اي ضرر بالعكس لما العفشه بتتربط العربية بتبقي انعم في المطبات مع الجنط الجديد ..
بالنسبة لراكبي الابيزا 94 .. الجنط ال 15 متقلش الدركسيون اطلاقاااااااااا
و ادي صورة الجنط و هو محطوط ادام العربية و هيتركب
http://www.mediafire.com/i/?td51imjtmhd
http://www.mediafire.com/?td51imjtmhd
معلش طولت عليكوا بس حبيت اديكوا كل التفاصيل عشان لو حد محتار او في سؤال في دماغه ممكن يلاقي اجابته هنا
