[مهند سالم]

أولا: أنا شايف إن موضوع سواقة الستات ده واخد أكبر من حجمه، وحضرتك مدياه اهتمام زائد قوي، يعني معظم الناس إلا كتبت عن سواقة الستات كلامهم كان فيه شيء من المرح والتهريج، وإن كان في مضمونه جد، بس يعني مش قصدهم يغلطوا قوي في الستات.
ثانيا بالنسبة للنصائح، أنا ملاحظ على سواقة الستات الآتي:
1- اهتمامهم بالمرايات ضعيف، وفي كثير منهم بيبقى اهتمامها بالمرايا بس لتعديل الميكاج، ودي كارثة؛ لأنها بتبقى في عربيتها في معزل عن الطريق، مش عارفة مين وراها، مين عايز يعدي يمين، ومين شمال، وهكذا.
2- خوفهم من الطريق زائد، وده بيخليهم يتلخبطوا، وبرده بيخليهم يمشوا بطيء جدا.
3- كثير جدا بأشوف بنات سايقة وهي بتتكلم في الموبايل، وده بيزود الطين بلة؛ لأنها بتمشي ببطء أكثر وبتتلخبط أسرع.
4- تفاعلهم مع الطريق يكاد يكون منعدم، يعني دائما تلاقي الرجالة متفاعلة مع الطريق، بيكلمك وتكليميه ، حركاته بالعربية بتتكلم، ممكن يكلمك بالنور، وممكن يكلمك بإيديه، وممكن يكلمك بالكلس، دائما الراجل متفاعل مع الطريق، عارف العربية إلا وراه عايزة إيه ومين إلا سايقها راجل ولا ست، الراجل متفاعل مع الطريق، على فكرة وخاصة بتوع الأجرة، طبعا أقصد المحترمين منهم.
يعني دي الحاجات المهمة،
وفي النهاية أرجو إن يكون موضوع سواقة الستات ده مش مضايقك أو واخد أكبر من حجة بالنسبة ليكي، يعني أنا شايف في المجمل الحال ماشي، مفيش مشكلة كبيرة إن شاء الله، وربنا يسترها عليهم وعلينا،
وفي النهاية الطريق مفيهوش كبير، الحادثة بتحصل في أقل من ثانية، وشيخ السواقين ممكن يعمل حوادث، ده نصيب، وربنا يعافينا