المشاركة الأصلية كتبت بواسطة ROMEOOO
عندك حق في موضوع انها جر امامي لكن متنساش إنها كانت موديل 1999 يعني مش 2004 ولا 2006 وجر امامي ده عيب بالنسبة للكريسلر لكن من بعد ال 2005 بقت جر خلفي وفيه بعد الموديلات من كريسلر 300c أو فيه موديلات دفع رباعي أما عن الخامات الداخلية 1999 فرق كبير مبينه ومابين 2009 وياريت تقارن المرسيدس العيون 1999 بيها هتلاقي المرسيدس تتميز في حاجات لكن في الراحة الكريسلر تكتسح أما الكبوت فـده لازم التوكيل لان كل الامريكاني من عربيات وموتوسيكلات وحتى طيارات بيقفلوا الموتور ببوكسات بحس إن محدش يلعب فيها وده عيب محتاجة متخصصين قوي عشان يغيروا حاجة فالموتور برة التوكيل في الحرفيين في ناس بتفهم فيها وموضوع فراملها ضعيفة يمكن التيل عاوز يتغير بس والعربية واطية فـده مش عيب فالعربية ده عيب في المطبات اللي بتتعمل هنا حضرتك المطب علي محطة مواصفاته في مرور الدخلية الهوا اقصى ارتفاع 7 سم وطوله 2 متر لو اتعمل مش هيبقى فيه شكوى من موضوع المطبات لكن لما كل واحد يطلع يعمل مطب قدام بيته فـده مشكلة , ده التوكيلات عندنا بترفع العربية مخصوص يعني الكورولا برة أوتى واللانسر وكل ده احنا بنعليها مقابل إنهم بيشيلوا كتير من الكماليات وده يظهر في الفرق مابين المصري والعربية اللي جاية من برة أما سعر اعادة البيع فـده في معظم العربية كده إذا كانت كريسلر ولا أودي ولا جاجوار ولا الفا روميو ولا كل ده والسبب إن الناس مبتشتريش غير عربيتين في مصر لو هيجيب غالي باي ام دبليو أو مرسيدس فـبتتجمع محلي عشان تبقى ارخص عشان الجمارك وده يرجع ل فضل التوكيل بتعمل زمان علي شهرتهم أكتر عربيتين في مصر, أما الأودي تعتبر زي الباي ام دبليو في كل حاجة وأحسن في بعد الحاجات. كل العيوب اللي في الكريسلر 300m اختفت فل300c ماعدا إنها واطية ,أما بقى اللي مفيهاش ولا مشكلة أو عيب من الحضرتك قلتله وتبع كريسلر وتمنها كويس جدا الدودج رام وتمنها رخيص عشان بتترخاس نقل هي تمنها في الأصل 270 ألف بتتباع بـ 320 أما لو ملاكي إضرب في 250 في المية هتدخل في 850 ألف لو ملاكي وهي بتترخس حاجة اسمها عام جمهوري وهي معناها إنها تمشي في أي حتة في مصر غير باقي النقل وده ميزة الدودج رام هي جامدة جدا وإن شاء الله لما والدي يجبها هبقى أعمل عنها تقرير بس ياريت يعملوا قسم للدودج زي الكريسلر
لكم جزيل الشكر وفائق الاحترام
|
مساءك فل يا باشا
أولا انا مش قصدى مدح ولا ذم فى العربية انما انا اقر حقائق ووقائع تجربة شخصية..
و انا ماجيبتش سيرة 300 C فى كلامى خالص لأنى بصراحة ماسقتهاش و مش مع حد من اصحابى أخرى ركبتها فى المعرض و هى و اقفة و ماعجبنيش الانتريور بتاعها شبه الدودج تشارجر بالظبط ..... بس كعربية بصراحة ماعرفش عنها حاجة .. فا مقدرشى افتى
و انت بتقول ان 300M كانت جر امامى و هى 1999 لحد 2004 يعنى مش موديل ستينات ولا سبعينات برده ....
و بالنسبة للمقارنة بين كرايسلر 99 و عيون 99 فازى ما انت قلت الكرايسلر تتميز بالوسع عنها فقط أما كل حاجة تانية فى صالح المرسيدس طبعا .....و بلاش تدخل الكرايسلر فى مقارنة مع المرسيدس علشان صعب قوى و طبعا المقارنة ككل هتكون فى صالح الوحش الالمانى.
أما ماهو تحت الكبوت و طريقة تقفيله المعقدة جدا فا هى طبعا مش فى كل الامريكانى ولا حاجة زى ما انت بتقول .... انا معايا شفروليه كابريس 2004 و طبعا الموتور عليه غطا بس كل حاجة واضحة و بسيطة فى الفك و التركيب....و بعدين انا بكلمك عن تغيير بطارية مش عمرة موتور ...حلوة معقدينها علشان محدش يلعب فيها دى ... ههههه.. سامحنى..
اما عن الموتسيكلات و الطيارات ... انا ماعرفش عنها حاجة .. عشان كدة مش هفتى ....
بالنسبة للفرامل الضعيفة عيب فى كل عربيات اصحابى و غيرنا التيل و الديسكات كمان مافييييش فايدة .... هى عربية فراملها ضعيفة و ليست مناسبة لقوة المحرك و القصور الذاتى الذى ينتج عن وزن السيارة و انا قلت (ضعيفة نوعا ما ) و ماقلتش انها ضايعة خالص...
حكاية العربية واطية فا دى انا معاك فيها ان مطابتنا فى مصر هى اللى غير مطابقة للمواصفات... بس جرب تركب 4 افراد او اكتر فى العربية كدة بقى محتاج تراك فورميلا 1 تمشى عليه مش شوارع عادية ..... و العيب ده موجود فى عربيات كتير .. ايه المشكلة يعنى ....
و سعر اعادة البيع المتدنى فله اسباب كثيرة و لن اخوض فيه و ده فعلا لأن فيه عربيات كتير اسعار اعادة بيعها متدنية جدا زى الاودى مثلا زى ما انت قلت
و اما عن الدودج رام .. انت كدة دخلتنا فى حاجة تانية خالص... فى النص نقل.. كل اللى اعرفه عنها ان موتورها قوى .... غير كدة انا ماعرفش عنها حاجة فا مش هفتى
لكن انا اعرف كتير جدا عن دودج ديورانجو لأنى كنت هشتريها فى يوم من الايام
فا لو عاوز نتكلم عنها تحت امرك ....
وطبعا يا باشا مستنيين تقريرك عن الدودج رام بفارغ الصبر ...
كلمة اخيرة .....
يا ريت بلاش التعصب من اجل سيارة معينة بعينها .. انا لما دخلت قلت مميزات و عيوب و صدق على كلامى الاستاذ حورس الذى كان أحد مالكى السيارة و كانت له معها صولات و جولات .. واعتقد اللى يهمنا اكتر فى المنتدى هو تبادل المعلومات ....
مادخلتش اشتم و خلاص و لا امدح و خلاص و لما انت رديت عليا كنت موافق معاك الرأى فى بعض النقط.... فا يا ريت بس بلاش التعصب لعربية بعينها لأن مفيش فى الدنيا كلها عربية كلها عيوب بس او مميزات بس.....
و فى الاخر هى وجهات نظر و ما تقوله حضرتك هو رأيك الشخصى فقط كما هو عنوان الموضوع ..... و هو زى آراءنا جميعا يحتمل الصواب و الخطأ ...
ولك فائق الشكر و الاحترام