[lost2008]

ديه اول مشاركه ليه فى المنتدى ده, و من الى قراته فى المنتدى يشرفنى انى انضم ليكم.
اخش بقه فى الموضوع, ناوى اشترى عربيه سيدان عائليه فى حدود 70 ل80 الف, و لو ال80 تبقى تعويره جامده عليه, عشان لسه فيه مصاريف فرش العربيه و الترخيص و كده , المهم لقيت نفسى طبعا محصور فى عربيات تجميع محلى شوفت الفيرنا و اللانوس و شطحت شويه و شفت رينو سيمبول, بصراحه الفيرنا ال 1600 ال GLS حلوه , اللانوس مش قادر ابلعها خالص رغم الضمان المغرى , الرينو سيمبول حلوه من ناحية وسع الصالون و الشنطه كبيره جدا تتفوق على الفيرنا و اللانوس , بس الى قلقنى انى مش حعرف اصلحهه بره التوكيل و كمان لسه نازله جديد و الله اعلم حتمشى فى السوق و لا لا, الفيرنا الى قلقنى منهه عيوب الصناعه ,لكن قطع الغيار سالت عليهه فى شارع دمشق و لقيتهه موجوده و اسعارهه معقوله جدا, قولولى رايكو بموضوعيه يا هينداويه ,انا بقالى 10 سنين راكب 128 و نفسى ارتاح و الاقى عربيه تستحمل مشاوير طويلة,,