هل الحل نبتسم في وش بعض؟
انا فضلت الف علي اقسام المنتدي يجي ربع ساعة عشان اعرف هاقعد اتكلم معاكم فين
ومعلش الموضوع غريب شويه وممكن اطول عليكم بس حبيت افضفض معاكم والقصة بتبدأ من الاتي:
قبل ما اسافر من مصر كنت متجوز وظروفي علي قدي زي ناس كتير في مصر زي مابيقولو االي جاي علي قد اللي رايح والحمد لله بس بصراحة كنت كاره البلد باللي فيها وأول ما جاتلي فرصة اني اسافر وقف الجيش في وشي
وكانت مشكلتي مع الجيش كالاتي:
انا متزوج ومش شغال وظيفة حكومية بتاجر وشغال في السياحة ولا في عقد ولا تأمين وفي زيي كتير
ساعت ما الجيش يطلبني لأستدعاء كانت النتيجة بتبقي
بما ان المرتب يدوم مكفي فالشهر بتاع الجيش بيعملي عجز تقريبا 3 شهور قدام والمرتب اللي الجيش بيديهولي عشان الاستدعاء ميكفيش نص ايجار شقتي طب وباقي الالتزامات اجيبها منين
والاصعب من ده انك عشان تسيب شغلك اللي زي ما بيتقال عليه (عامل زي عمال اليومية) عشان تروح استدعاء مديرك مش هيستناك هيجيب حد غيرك عشان يشتغل ويا تروح عليك الشغلانه يا تستني عشان يشوفولك حاجه ترجع فيها
وكانة النتيجة اني مروحتش الاستدعاء (يعني اخرب حياتي عشان مين ؟؟؟؟)
كانت النتيجة قضية وغرامه عشان خاطر اسافر ودي من اكبر سلبيات بلدنا
ليه يعني انا اخش الجيش واقضي الخدمة العسكرية اخرج من الجيش اديت اللي عليا لبلدي المفروض
بلدي اديتني ايه
(شغل مافيش يعني لا وظيفة ولا مرتب وشغال بالأجره وعلي البيع والشرا وحاجه تطلع من هنا وحاجه تطلع من هنا)
(اللي خد تأجيل من دفعتك بتحس انه سبقك بمراحل انت خارج من الجيش علي الهواء مباشرة وهو ممكن يكون اشتغل وربنا كرمه وانت لسه هتدور)
(اما بقي اللي عمل هروب ومقدمش نفسه للجيش بعد شويه دفع 2000 جنيه وحكايته خلصت وانت لسه بيبهدلوك في الاستدعاء)
وقبل ما اسافر باكم يوم راكب عربيتي( علي فكره عربيتي مش حديثة بس بحبها مووووووت) (سيات 133) اسمع في الراديو حاجه ضحكتني علي برنامج في نجوم اف ام
قال ان كل اللي سامع ازاعة نجوم اف ام لو قابل حد يبتسمله حتي لو عمل معاك ايه والناس تتصل وتقول انا ابتسمت لواحد برقلي وهكذا
فضلت اضحك من غيظي لحد ما وصلت لأني ساعتها كان عدي محكمة عشان موضع قضية الجيش بتاعتي ورايح وعارف اني هيتحكم عليا بسنه حبس وغرامه 500 جنيه
وبعد ما سافرت واكتشفت ان مصر مش هية الحكومه اللي مبهدلانا ولا النظام الفاسد والقوانين الظالمه
اكتشفت انها اهلي وصحابي والناس اللي بحبهم لو موجودين في اي مكان هيبقي بالنسبه ليا جنه
افتكرت موضع الابتسامه
بس بشكل اصح هو مش ابتسامه
هو ان زي ما قال الرسول علي الصلاه والسلام
لا يغير الله ما بقوم حتي يغيروا ما بأنفسهم
يعني نبدأ بنفسنا ونفسي بجد اشوف البلد ديه اهلها بتحب بعض
علي فكره انا شفت بره حاجه غريبة
الهنود بيكرهو بعض بس بيساعدو بعبض يعني في الصح والغلط ماحدش يبيع التاني
والباكستانيين لو واحد عنده مشكله الكل بيلمله وبيساعده بعض
لكن المصريين عاوزين يمشو بعض اللي معاه زميله عاوز يمشيه ويشيل شغله حتي لو مش هيزيد في مرتبه
ومعلش دي الاغلبية رغم ان ربنا كرمني بناس جداد وشباب زيي اتفقنا اننا نغير الفكره ديه والحمد لله
في اول موقف حصل وكان واحد منننا هيمشي وقفنا وقلنا لو هيمشي نمشي كلنا والحمد لله النتيجة كانت ان الموضع اتحل وده لانه كان مظلوم
فنفسي حتي لو نبدأ مع بعض في الموقع ده
نقف جنب بعض حتي لو لليي قريب منك في منطقت لو تقدر تساعده ومش هيكلفك حاجه
يعني من فترة كان في عضوه قالت اني اتنصب عليها في عربية
بجد كان نفسي اكون في مصر واروح معاها للي نصب عليها ولو انا واي حد فيكم كان يقدر يجي ونروح معاها صدقوني هنجيب حقنا
لان في حاجتين
الحقوق تأخذ ولا تعطي
ودايما الجماعة اقوي من الفرد
اسف للاطاله بس بجد كان نفسي اتكلم معاكم
اخوكم احمد منسوب
__________________
إن الملوك بلاء حيثمـا حلـوا فلا يكن لك في أبوابهـم ظـل ماذا تؤمل من قوم ٍ إذا غضبوا جاروا عليك وإن أرضيتهم ملوا فاستغن بالله عن أبوابهم كرمـاً إن الوقوف علـى أبوابهـم ذل مصرى وأفتخر وبحبك يا مصر
|