[مهند سالم]

ساعات الواحد مننا يبقى نفسه يتكلم عن عربيته بحرية وبصراحة، يعني يفضفض، يقول كل شيء هو شايفه في عربيته، عيوبها قبل مميزاتها، ولذلك أنا سأبدأ:
عربيتي مازدا 323 موديل 1982، 1300 سي سي:
أولا العيوب:
- واطية شوية على الأرض، وإلا كان قبلي ربنا يسامحه كان مركب عتب تحت البيبان، هو شكله كويس، لكن سعادته بيحك في المطبات وخصوصا لما تكون العربية محملة.
- العربية ما بتحبش الزحمة ، لأنها لما بتمشي كثير على الأولاني في الحر والزحمة والماتور يسخن ما بيبقاش عاجبني، يعني تحس إنه مش متظبط قوي، مبرجل شوية، يعني هي مش ملحوظة قوي ، لكن حاجة مضايقاني، ويمكن عشان الموتور 1300 سي سي.
- العربية فقيرة في الكماليات، يعني ما فيهاش باور وتكييف وكدة.
- الفتيس مقرب من كرسي السواق قوي، يعني لو واحد مليان شوية إلي بيسوق يبقى وهو بيجيب الأولاني هيوسع رجله اليمين شوية، ودي برده حاجة تضايق، لأني مش لازم أعمل دايت عشان أجيب الأولاني في عربيتي.
المميزات:
- عربية ناعمة جدا، وسحبها جميل.
- ثابتة على السرعات العالية، يعني 140 مفيش مشكلة مع ثبات.
- سواقتها سهلة، يعني عربية تحببك في السواقة.
- نقلة الفتيس جميلة، يعني ممكن تغير بصوابعك.
- الفرامل بسيطة وبترجلش نفسها.
- قطع غيارها مش غالية ومش رخيصة بس الياباني منها معمر.
- قطع غيارها موجودة، سواء الجديد أو الاستيراد، طبعا هي مش في انتشار الفيات ، لكن موجودة وانتشارها كويس جدا.
- مش ضيقة، يعني رغم إنها 1300 سي سي، لكن تشيل خمسة كويس، بس مشكلة الحك في المطبات.
- استهلاكها للبنزين كويس، يعني بره البلد الصفيحة تعمل 200 كيلو، أما جوة البلد فتعمل 160 كيلو.
- تحط ليها بنزين 80 عادي، ولا يؤثر كثيرا على النعومة والسحب.
- شكلها حلو، مع جنوت سبور، وأنا بصراحة بأركب ليها اكصدامات شاهين، بتخلي شكلها حلو.