رخصة السيارة أتسحبت ... !! أفيدونى أفادكم الله
السلام عليكم ورحمة الله
خير اللهم اجعله خير كنت رايح مشوار ناحية القاهرة وانا من الدلتا
المهم عند مدخل قليوب لقيت باشا من باشوات المرور من ابو نسر على كتفه واقف وبيفحص السيارات
عادى انا مش واخد فى بالى علشان انا ماشى زى ما كتاب المرور بيقول يعنى متحزم من ساعة ما حطيت الكونتكت
واديتها مارش وماشى على الصراط المستقيم يعنى بسرعة من 80 الى 90 وده الحد الاقصى كمان العربية 128
يعنى السرعة دى حلو قوى عليها المهم الباشا شاورلى رحت واقف ومطلع الرخص وانا فى بالى انه هيشوفها
ويفسح الطريق كالعادة ولـــــــكــــن .....!!!!
اذ به فجأة وعلى غير العادة يقولى اركن على جنب ويشاورلى على واحد واقف فى جنب ومعاه جهاز ويقولى عنده
هناك المهم رحت زى ما قال لقيته راح حاطط حاجة كده زى الخازوق فى شكمان العربية وراح كاتب حاجه عنده
ويروح الباشا واخد رخصة التسيير ويدينى وصل طيب ايه يا باشا الموضوع يقولى قال ايه نسبة العادم اعلى من المعدل الطبيعى يعنى خلاص يعنى الدنيا خربت والشوراع اتخنقت من عربيتى ولا يمكن انا اللى خرمت الأوزون
مش عارف بصراحة اول مرة اسمع عن الموضوع ده انا كنت اسمع انه بيبقى عند ترخيص العربية مش كمين وحوار
ومش عارف ايه اللى هيتم انا سألت الباشا قالى روح ظبط العربية وبعدين استنى لما الرخصة ترجع المرور بتاع بلدكم ولما توصل روح قيس العادم ولو مظبوط هتدفع الغرامة وتاخد الرخصه
طيب انا عايز من حضراتكم بعض المعلومات لو حد قابله الموقف ده ويا ريت يدينى الافادة التصرف هيكون ازاى
وتوبة من دى النوبه اقرب من العاصمة تانى ومش طالع من بلدنا صحيح من طلع من داره اتقل مقداره
ويجعله عـــامــر .... !!!
ptmnlo123per144ptmnlo123p er144ptmnlo123per144
|