[المناور]

أنا كنت باتعلم على عربية 128 فى مدرسة سواقة وكنت باتعلم عند نادى الصيد كده ، الشوارع فى الحتة دى واسعة وفاضية والعربية يادوب سرعتها على قدها ، بعد ما خلصت التعليم مع المدرسة دى لقيت واحد صاحبى عمل فيها ابو السباع وقالى انا مستعد اعلمك السواقة وعلى عربيتى وعربيته كانت lada قلتله ماشى يا سيدى بس خد بالك انا لسه جديد وعايز شوارع واسعة قالى ماشى حاخدك على المعادى عندنا فيه شارع مناسب جدا ليك قلتله يلا بينا المهم البيه اخدنى ولقيته وقف قدام عند أول الشارع اللى فيه سفارة اليابان وقالى يلا سوق ابصلك على الشارع يا ريس الاقيه عبارة عن شارع راكن فيه عربيات على اليمين وعلى الشمال ومفيش مكان غير لعربية واحدة تمشى فى النص أنا بصراحة اتخضيت من المنظر ده لانى مش واخد على السواقة فى مكان ضيق ده غير انى العربية لو وقفت منى وورايا ناس وقعدوا يضربولى فى كلاكسات بيجيلى توتر اكتر وبناء عليه رفضت اسوق فى الشارع ده بس صاحبى صمم انى اخد الشارع ده علشان اتعلم يا عم يهديك يرضيك بلاش مفيش يا ريس حاتسوق هنا يعنى حاتسوق هنا طيب توكلنا على الله ركبت العربية ولاحظت انها اقوى بكتير من ال 128 وسحبها اسرع والدركسيون تقيل زى الحجر فقلت اهدى اللعب شوية وفضلت ماشى كويس فى امان الله لغاية اما لقيت صاحبى بيقولى خد اليوترن اللى جاى ده المهم أنا ساعتها كنت ماشى على التالت فروحت واخد الملف من غير ما اهدى ولا احسنها سواق تقولش مايكل شوماخر بيسوق وبعد ما اخدت الملف اعدل بقى ياريس مفيش اخوكم هنج على كده وماعرفتش اعدل العربية صاحبى عمال يصرخ جنبى اعدل يابنى حانعمل حادثة وأنا زى ما تقول المفاجأة ثبتتنى وخلاص كنت حالبس بالعربية فى جنب عربية دايو راكنة ومرة واحدة لقيت العربية وقفت قبلها بشبر ببص لقيت صاحبى شد الهاند بريك ولحق القصة ، طبعا حمدت ربنا وكنت حانزل اسجد سجدة شكر ونزلت من العربية وأنا جايب الوان الطيف وحلفت ما اسوق فى الشارع ده إلا إذا تمكنت من السواقة تانى ابدا وصاحبى من بعدها بقى بيسمع كلامى ويخلينى اسوق فى الشوارع الواسعة جدا الىل اقوله عليها لغاية اما ربنا كرمنى وبقيت بعرف اسوف والحمد لله