[sh_masry]

السلام عليكم ,,,

معلش هاتكلم معاكم فى موضوع هايف بس كبير فى فقد الثقه مابين المواطن العادى الطبيعى الذى لا حول له و لا قوه و بين الكدب و الخداع الحكومى .......
الموقف انى كنت مسافر الأسكندريه من حوالى اسبوع و قبل الكارته بتاعت طريق القاهره الصحراوى (يعنى فى ابو رواش) لقيت عربيه مرسيدس جديده قدامى نمر اللوحات بتاعتها (و دى المفاجاه ليا انا شخصيا بعد ما كنت مصدق الحكومه) أ ن أ 121
انا كنت فاكر انهم قالوا مافيش حروف او ارقام متكرره , الظاهر كده انهم عرضوا الأرقام دى على اساس انها مميزه و بتتباع بشئ و شويات ..... انا مصورتش العربيه لعده اسباب و اولها انى اتضايقت لما شفت النمر دى و حسيت اننا عايشين فى مستنقع كدب و افترا على خلق الله الغلابه اللى مالهمش ظهر و ماعهمش فلوس
تانى سبب انى لما قلت اصورها فكرت و لقيت ميت واحد هايطلع و يقولى فوتو شوب و كلام مالوش لازمه
تالت حاجه لما قلت هاصورها و على على اعدائى العربيه دخلت يمين على ابورواش و انا كملت على الصحراوى و حتى كنت هاتخانق معاه لأنه كسر عليا كسره غبيه و هو كان ماشى شمالى و انا داخل على بوابات الجيش اللى على الصحراوى و مره واحده دخل يمين من قدامى من اقصى الشمال .
عموما انا بس كل اللى غايظنى كدب الحكومه حتى فى الهيافه بتاعت النمر المميزه هههههههه
يا ترى اخره الموضوع ده ايه بقى ؟؟ مش هانبقى متحضرين و نخطط الأول قبل ما ننفذ و نتكلم وللا كله هلاهوطه و كله يعمل ما بداله فى الشعب و اللى يكدب يكدب و اللى يبيع يبيع و اللى يسرق يسرق و قشطه يا مان روق الجى و كبر الدى و خليها تولع