رد: هل تعتبر نفسك بتعرف تسوق؟؟؟
سؤال وجيه هل تعتبر نفسك بتعرف تسوق؟
القيادة فى رأيى الشخصى تتكون من ثلاث اجزاء
1 - قائد السيارة
2- حالة سيارتك
3 - السائقين الاخرين
4 - الطريق
فى وجهة نظرى إن اللى بيتعامل مع العاملين الاخرين بحكمة يبقى سواق كويس
يعنى اية بحكمة؟
1 توقع اخطاء الاخرين هههههههه و والله هيا كتير اوى و اوعى تقول ان انت مش بتغلط
2 سرعة رد الفعل عند حدوث خطا من الاخرين و حسن التصرف و كتير كلنا اتعرضنا للمواقف دى
3 الهدوء فى القيادة ناس كتير بيتعصبوا اول لما يقعدوا على كرسى السواق تلاقيه بقه عصبى و متوتر من غير داعى
4 بالنسبة لموضوع الذوق و الاصول فمحدش هيعجبه العجب ولا الصيام فى رجب لو وقفت عشان تعدى حد اللى وراك هيهريك كلاكس ولو مشيت من غير ما تعديه هيقول قلة ذوق عشان كدة موضوع الذوق ده موضوع نسبى بس حاول بقدر الإمكان انك تكون مهذب و زوق
5 السلوك السىء للسائق بينعكس على طريقة قيادتة و كلنا بنسمع ألفاظ بالكلاكس بلاش ندخل بيها
بالنسبة للطريق
لما تسوق فى مكان مش عارفه او اول مرة تمشى فيه بتكون اكثر علاضه للتعرض للحوادث و دغدغة و فشفشة و بهدلة العفشة على عكس لما طريق تكون مقطعه كل يوم رايح جاى تاخد يمين فى المكان الفولانى و تمشى فى النص فى الوقت الفولانى و لازم تاخد شمال دلوقتى عشان هتقبلك بلاعة بنت حلال
بالنسبة للكبارى موضوع كبير جدا لأن المنحنى الخاص باى كوبرى له حسابات و نصف قطر دورانه بيكون معمول باسلوب هندسى لكن كم مرة سمعت ان عربية وقعت من فوق كوبرى؟ متهيالى كتير
بالنسبة للتصرفات اللى بتتعمل من الناس فى السواقة و مش بحبها
الكلاكس على الفاضى و المليان مزعج جدا جدا جدا
انصح قائدين السيارة بالهدوء و السيطرة على النفس و الإلتزام بالقوانين و خصوصا بعدم السير فى الإتجاه العكسى و عدم دخول يمين او شمال فى الاماكن الغير مخصصة لذلك
الحقيقة موضوع كبير جدا جدا و عايز كلام كتير جدا جدا
اهنيك على فكرة الموضوع الجميلة و المهمة جدا و مش عايز اطول عليكوا اكتر من كدة
__________________
شارك دافع عن أفكارك
|