السلام عليكم ورحمه الله وبركاته
بعد ماكتبت الموضوع دا بخصوص استخراج رخصه خاصه
http://www.masrmotors.com/vb/showthread.php?t=19360
فكرت بعديها قولت طيب منا اطلعها انا بمجهودي وخلاص ومنها الواحد ياخد خبره
روحت المرور يوم الاربع الي فات قدمت ورقي وظبطت الدنيا
قالولي الامتحان يوم الاتنين
قولت تمام في فتره الواحد يتدرب فيها
عندنا في المرور لازم تمتحن علي عربيه المرور الي هي النص نقل
لو معكش عربيه
ليا واحد صاحبي عـندو عربيه نص نقل بس عريضه شويه عن بتاعت المرور
ورحت منطقه فاضيه خالص
وجبت كراتين عملتها زي الاقماع علي شكل S
وبقيت اتمرن عليها وبقيت فيها تمام
النهارده روحت المرورطبعا كالعاده من الساعه 8 قـدمت الورق عشان اخش امتحن اشارات
امتحنت اشارات تمام وجبت اتنين غلط
المهم الموظف قالي يلا روح امتحن سواقه
اول ما روحت لقيت ناس كتيـر واقفه وناس عماله تخش تخبط في الاقـماع
انا بصراحه بقيت خايف بس قولت ياواد خش وقلبك زي الحديد يعني انت لو سفطت هيبقي يعلقولك المشنأه
جيه الدور عليا ركبت العربيه لقيت العربيه اول ماشيلت رجلي من ع الدبرياج لقيتها بتجري اتاريهم معلينها
طلعت بيها قدام وورا تمام التمام
نزلت خدت البطاقه من العسكري وقالي تعالي بكره
بكره هروح اخد الورق بتاعي وانشاء الله اجيب الرخصه