السلام عليكم ورحمه الله وبركاته
انا عضو جديد معاكم احب اولا اشكركم واحييكم علي المنتدي الرائع ده بل الاكتر من رائع وبصراحه فادني في معلومات كتيره مكونتش اعرفها في العربيات
ثانيا انا عارف انها صعبه كده يبقي اول تعارف بينا طلب مني بس بجد الموقع ده جالي من السما
الطلب هو او عاوز اقول مقدمه صغيره عشان مطولش عليكم ومحدش يتخنق مني في اول تعارف بينا اللي يارب يدوم بينا بخير
انا دلوقتي بسافر كل يوم وبتمرمط في المواصلات انا ومراتي لو حبينا نروح اي مشوار بليل بسبب ان سواقين التاكسيات البشوات بيتأمروا علينا انا من المنصوره علي فكره ونفسي بجد اشتري عربيه وبقول لنفسي الفلوس بتاعت المواصلات تتصرف علي قسط العربيه وبنزينها القليل بحكم احتياجي القليل للعربيه اللي من خلال السفر الصبح للشغل
فاطلبي عاوز عربيه اي موديل معقول تكون قسطها ميزدش علي 300 جنيه عشان ده بعد حساب بيني وبين نفسي هو اللي اعرف اوفره من المرتب بعد مصاريف البيت ومش مشكله علي كام سنه يارب يبقوا عشره والحاجه الحلم بقي انها تكون من غير مقدم وللعلم انا معنديش اي حساب في البنك ومرتبي مش بيتحول علي البنك رغم اني موظف حكومه.
ارجو لو حد يعرف يساعدني ميبخلش عليا في الرد
وتقبلوا مني وافر احترامي
اخوكم هيثم
ومش عارف قوانين المنتدي تسمح اني احط تليفوني عشان لو حد يعرف يفيدني بس هتواصل معاكم من خلال المنتدي ان شاء الله