[AbOnOrA]

والله يا دكتور انا كنت فاكر ان لحد الصفحة التالتة هو ده التقرير والباقى لما ترجع اتارى انا ضاع منى فروت سلاد رائع فيه موز كتير شويه بس فيه فواكهه تانية ظابطه الطعم

وبجد ده من اجمل التقارير عن السيارات عامة مش بس عن السيراتو لان التقارير يا جماعة مش مجرد ذكر مواصفات او تقييم وبس التقرير بيبقى اجمل لما يكون بيعكس تجربة مستخدم وبيكون اجمل واجمل لما التجربة تبقى مصاغة ومدونة باسلوب بسيط ومتميز زى اسلوب دكتور عبد السلام علشان كده انا بعتبر ان النوعية ديه من التقارير والموضوعات هى القيمة الحقيقية للمنتديات لان المعلومة اوالمواصفة الفنية بتتجاب من مائه مكان التقييم ليه هئياته ومصادرة والمنتديات مازالت اداة غير دقيقة للتقييم اما التجارب والخبرات والاراء والنقاشات الجادة والموضوعية والمستندة على اشخاص حقيقيين وعقليات ناضجة وبعيدا عن الاثارة والتهويل والدعاية والترويج فديه الحمد لله مكانها هنا ودكتور عبدالسلام وباقى الاسرة من الاعضاء يعتبرو من النخبة اللى قدرت فعلاً تفيد قطاع عريض من الناس بتجارب وخبرات صادقة بدون اى مصالح شخصية وباسلوب شيق ومبسط يضارع فن التدوين وبدون اخلال بالنواحى الفنية

تسلم ايدك يا دكتور على التدوين الممتع والتقرير المقنع والتقييم الموارب وبإذن الله بعد صيانه العشرين هتكون الدنيا اوضح وتكون قدمتلنا بانوراما مجسمة عن العربية

بالنسبة لموضوع النتروجين حضرتك لو عدين الناحية التانية من جسر السويس ورا حديقة بدر هتلاقى درش بتاع الزوايا عنده نتروجين وعنده احدث جهاز زوايا يطمنك على زوايا العربية
وبالنسبة للهبد ده بيبقى صوت كاوتش مش مليان كفاية زى كورة مش مليانة مظبوط لازم تهبد لكن باستخدام النتروجين تقدر تظبط الكاوتش بالمقاس الستاندرد من غير ما تخاف الكاوتش ينفجر مع السرعة او الحرارة زى ما بيحصل مع الكاوتش العادى وديه ميزة النتروجين
لكن فيه ناس فاكرة النتروجين ده بيطرى العجل ويمتص المطبات وووو لاء برضو هو مش للدرجة دى
هو الموضوع انه بيديك اداء ادق واكثر ثبات لضغط الكاوتش وده هقلل من الهبد وهيقلل من استهلاك البنزين بس هيقلل من الثبات كمان الا لو الكوتش رفيع
انا بقالى فترة بتابع منتديات ومواقع اجنبية مستمعتش عن كلام عن السيراتو فى موضوع الهبد ده خالص ولا العفشة بالشكل اللى الناس بتتكلم فيه هنا ده ابداً لكن وارد تكون ظبط زوايا او ظبط كاوتش