رد: اختبار قياده و ملاحظات على النيوسيراتو أول 700كم
الحمدلله وصلنا للحلقه الختاميه لآول 700 كم وان شاء الله نكمل مع صيانة ال 1000 كم و مابعدها !
أنا قلت مميزات فى السيراتو و قلت عيوب وقلت ان فيه حاجات طلعت غير اللى أنا سمعته عنها خالص !
بس أكبر عيبين فيها الآتى :-
1- كثرة اللغط والكلام على السياره بالسلب والايجاب كأن الدنيا مافيهاش سيارات الا السيراتو ! و كأن اللى
ح يشتريها ح يروح النار !
2- وانت سايقها تلاحظ ان كل الناس بتبحلق فيك و فى السياره كأنهم شايفين عجبه ؟؟ سياره عجيبة واللى
سايقها أعجب ؟؟ و تجد عيون الناس تكاد تخترقك ! مش ح أقول للحسد ولكن بيحاولوا يتكهنوا ده مين وجابها
ازاى ! و يمكن فى الآخر يقولوا جتنا نيله فى حظنا الهباب ! يعنى لو راكب بى ام الفئه السابعه ولا مرسيدس
بودره ما حدش يبصلك ! أما السيراتو ؟؟ تلاقى الناس بتكسر عليك و بتحاول تقرب منك علشان تفحص السياره
واللى سايقها !؟؟؟
تقييمى للسياره حتى الآن ! سياره موتورها ممتاز وفراملها ممتازه ومنظرها شيك وواسعه من الداخل و معظم
الكماليات حقيقيه و شغاله وليست من نوعيه رديئه ! قد يكون فيه عيوب فى العفشه و لكنها لسه غير واضحه لى
حتى الآن ! توجيهها جيد و دركسيونها ثقله معقول بس غير مرن فى ارتداده فى الملفات ! الرؤيه الخلفيه سيئه
وعالجوها بمؤايات الجنب المتحركه وبالسنسور الخلفى ! بس برده مش مريحه بالنسبه لى !
السياره دلوعه وأعتقد ليست للخدمه الشاقه ! يعنى اللى عاوز تاكسى أو بيعمل مشاوير كثيره جدأ فى شوارع
زى الزفت والهباب ! ما يشتريهاش ! برده اللى عاوز يدخل بيها فى الحيط أو يقلب بيها القطر ! ما يشتريهاش !
الشباب اللى عاوزه تجرى و تعمل بيها مغامرات ! ما يشتروهاش علشان هيه أقوى من كفائتهم و ح يحصل لهم
حوادث والعياذ بالله ! اللى بيدور على عربيه بتوفر بنزين وقطع غيارها رخيصه ! برده ما يشتريهاش !
اللى بيخاف من الكلام بتاع المنتديات و مدعى الخبره فى جميع أنواع السيارات ! ما يشتريهاش !
من الآخر ! دى بتاعة ناس مستريحه شويه ماديآ بحيث تقدر تصرف على بنزينها و قطع غيارها بدون تعب أو مجهود !
وقبلها تقدر تدفع ثمنها ولو باعتها بخساره كبيره ! ما يزعلوش ! و بتاعة ناس بتسوق بحرص الى حد ما ! تجرى
آه و تعمل بيها كل حاجه لكن من غير ما تعتقد أنها السياره التى لا تقهر ! برده بتاعة ناس عندها أكثر من سياره
يعنى مش ح تستعملها كبابور حرث ! هى مثل البذله الجميله النظيفه اللى بتعينها فى الدولاب و بتلبسها فى المناسبات
الهامه أو عند تدليع نفسك ! أنا اشتريتها و سمعت كتير عن عيوبها لكن حبيتها ! واللى بيحب بيتغاضى عن عيوب
حبيبه و بيتعايش معاه ! كل الناس عايزه السياره اللى 2000 سىسى و مابتاكلشى بنزين و قويه وسريعه وتسارعها
خطير و أوتوماتيك و صاجها متين وواسعه من جوه و كراسى جلد وجميع الكماليات اللى يعرفوها واللى ما يعرفوهاش!
واللى تجيب أعلى سعر عند اعادة البيع ويكون شكلها حلو ولونها حلو ورخيصه جدآ وياسلام لو بالتقسيط على 10
سنين! صدقونى لو فيه عربيه بالمواصفات دى و فى مصر ! كانت كل منتديات السيارات قفلت ! و كل أنواع السيارات
الآخرى بارت ! وكان ح يطلع ناس تقول لآه ده فيه أحسن من كده أو ناس تقول هوه مافيش الا نوع واحد ؟؟؟
آسف على الاستطراد لكنى قلت اللى فى نفسى ! و ممكن لو حد مهتم يجمع المميزات اللى أنا كاتبها فى ناحيه !
و العيوب فى ناحية أخرى ! و يقارنهم بما قيل فى منتديات أخرى و بعدين يكون رأيه الخاص !
وفى الآول و فى الآخر دى حتة حديده لا راحت ولا جت ! وفيه اللى أقل منها واللى أحسن منها بمراحل !
Dr. Bolbolan ptmnlo123per122
__________________
ليت الشباب يعود يوما  فأخبره بما فعل المشيب بى ! ptmnlo123per1127
|