[أشرف الشفقى]

لما رحت أعمل صيانة ال100 كم الأولى لعربيتى ال i10 الجديدة فى فرع قليوب حطولى زيت ماتور مكتوب عليه 15W-50، يعنى إيه الرقم ده؟

سألنى المهندس فى البداية عاوز زيت 5000 كم ولا زيت 10000 كم. قلتلوا 5000 أنا قلت علشان أعمل صيانة أول بأول بدل ما استنا. هل زيت ال 10000 أحسن من زيت ال 5000 كم؟ غير إنه بيقعد مدة أطول يعنى، هل هوة أحسن فى الآداء أو أحسن للماتور؟

لما بسوق بالليل بحسن إن العربية ناعمة وحلوة، لما بسوق الظهر بحس إنها مش بنفس النعومة والحلاوة. فى البداية كنت بفتكر إن ده مجرد تهيؤات، لكن بعد ما فكرت فى عملية الزيت ده وأرقامه قلت جايز الزيت بالليل بيكون لزوجته أعلى والماتور بيكون مبسوط ووقت الظهر بيكون الدنيا حر والماتور الزيت فيه لزوجته منخفضة والماتور مش معموله لوبريكيشن كويس.

محتاج حد خبرة يفهمنى إيه أرقام الزيت ده علشان أفهم القصة.

على فكره، هما حطولى زيت شيل، رغم إن من جوايا حاسس إن كان نفسى فى موبيل. وأول لما حطوه حسيت بزنة فى دواسة البنزين وأنا بدوس عليها، بس مع الوقت الزنة ده خفّت واختفت. نفسى المرة الجاية أحط زيت موبيل مش شيل.