[Dr. Bolbolan]

والآن نتكلم عن الثبات والاتزان و الحدفه الشمال ! ممكن علشان البعض منتظر النقطه دى بالذات !

طبعآ سمعت فى هذا المنتدى قليلا و فى منتديات أخرى كثيرآ آلاف التوبيكس عن الموضوع ده !

الآول كانوا بيمدحوا فى السياره كلهم بلا استثناء و فى الآخر معظمهم بيذموا فيها بعد حادثه شهيره !

و زى ما قلت ده أثار قلقى لكنى توكلت على الله ( و من توكل على الله فهو حسبه ) و ده مش كلامى !

بس المفروض الواحد يتوكل حق التوكل ! المهم بالنسبه للثبات و الاتزان يعنى عدم اهتزاز أو عدم انحراف

السياره عن مسارها المرسوم من قائدها خاصة على السرعات العاليه و فى الملفات برده على سرعات عاليه

نسبيآ ! الآول كانوا بيقولوا ثبات رائع و خرافى بفضل الجنط 17 و الكاوتش العريض وال Low Profile

و بعدين رجعوا قالوا ان السياره بتضرب شقلبظات و بتنط فى الترع لوحدها ولو على سرعة 60 ؟؟ و طبعآ

ده كلام غير معقول ! داحنا ما سمعناهوش عن السيارات الصينى ولا الروسى ولا بتاعة زيمبابوي !

لذلك من تانى يوم بعد الترخيص و فى صلاح سالم المزدحم بس الطريق مخطط حارات علشان أحدد الآنحراف

بالنظر مع الاحساس ! بصراحه لم أجد لا حدفه يمين ولا شمال وأنا ماسك الدركسيون بطراطيف أصابعى ! تجرأت

و تركت الدركسيون خالص ! برده مافيش حدفه ! طب دوست فرامل كثير وأنا سايب الدركسيون ! الحمدلله ولا الهوا !

المفروض أفرح بس كنت بأقول لنفسى هيه ما بتحدفش ليه ؟؟ سبحان الله ( من كتر اللى سمعته ) ! بعدها أخدتها على

منزل 6 أكتوبر اللى نازل على العباسيه ! و هو حلزونى وضيق جدآ بمعنى الكلمه ! وأشهد الله انى بالكورولا كنت

لما أزود السرعه شويه فى المنزل ده كانت بتعوم منى شويه وأسيطر عليها بصعوبه أو أخفف السرعه مع فرامل

خفيفه مع التزام الآدب التام خاصة لو كانت فيه سياره جنبى ! و كمان كنت بأشعر بدوخه ! ( آى والله العظيم ) !

أما بالنيو سيراتو فلم أحس بكل الكلام السابق ! لا لعب و لا دوخه و ثبات محترم ! بس كده بطلت تجارب بأه !

بعد أسبوع ! زى ما أكون زعلان انها ما بتحدفش ! و من كتر الكلام اللى قرأته فى منتديات أخرى زى مثلا سمعت

ان الكاوتش بييجى منفوخ 50 و لازم نظبطه على 32 علشان السياره تنظبط ! قمت رايح لبتاع الكاوتش وقلت له

ظبطهالى على 32 قام الراجل طبعا يقيس يطلع شوية هواء و يرجعهم تانى ! و قال لى كله تمام ! تصدقوا وتآمنوا

بالله ! ابتديت أحس بحدفه خفيفه جدآ غير ملحوظه غير لسائق متمرس ( للشمال ) فاستعذت بالله من الشيطان الرجيم

بس هيه ما كانتش مستمره و لكن تبعآ لميل و تعرجات الطريق ! قلت فى نفسى لآ يا واد ده الطريق هوه السبب !

و روحت و زوجتى كانت رايحه مشوار للقاهره الجديده واحنا فى النزهه الجديده فقالت تجرب السياره الجديده طبعآ !

و لما رجعت قالت لى الدركسيون تقيل و بتحدف شمال ! و هى لم تقرأ كلمه عنها فى أى منتدى ! طبعآ اتغميت وخلصت

الى نتيجه وحيده ! و هى ان السياره حساسه جدآ لآى تغيير فى ضغط الكاوتش و أى فرق ولو ملليلترات بسيطه بتعمل

فرق فى الدركسيون ! و بم ان كل بتوع الكاوتش يا اما أجهزتهم غير سليمه أو العمال طبعآ أى كلام ! الآسطى بليه !

فاغتميت لآنى أنا ده اللى عملته فى نفسى بضبط الكاوتش و قريت على نفسى ! و ده جزاء اللى يسمع الكلام الكتير

فى المنتديات من ناس ليسوا ثقه أو مايعرفش قوتهم المعلوماتيه فى مجال السيارات ! طب ايه العمل !

عندى خيارين ! الخيار الآول : أول لما أنزل هأعمل صيانة الآلف و أقول لهم يظبطوا ضغط الهواء فى التوكيل !

الخيار الثانى : سمعت ان فيه محطه اسمها " امارات مصر " عند كورنيش المعادى ! جهاز نفخ الكاوتش فيها

أوتوماتيك ! يعنى ما تقعدش تقيس وتهوى الفرده و بعدين تنفخها ! انت بتحط خرطوم الهوا على ابرة العجله و بتضبط

الهواء على 32 مثلا ! تعطيك 32 بالضبط و ديجيتال !

حاجه تانيه ! من أول يوم حسيت ان الدركسيون ما بيردش بسلاسه فى اليوترن زى الكورولا ولازم تساعده مساعده

خفيفه و ده ضايقنى جدآ ! لكن مع الوقت الموضوع ده اتحسن ! و صديقى أحمد كامل قال لى كل السيارات اللى بجنوط

كبيره و كاوتش عريض لازم تبقى كده لزيادة الاحتكاك بالآرض !

أظن كفايه كده النهارده ! أنا عارف ان أسلوبى ده مضايق ناس كتير ! همه عايزين المعلومه فى برشامه ! بس برده

أعتقد انه عاجب ناس أكثر ! لآنى بأحكى التجربه كأنكم جالسين أمامى و بندردش ! و كمان لآ أنسى التفاصيل التى

قد تكون مقنعه و تجدوا فيها مصداقيه ! غير اللى يقول مثلا " ثباتها رائع أو اللى يقول ثباتها زفت " بس بناء على

ايه ؟؟؟ الله أعلم !
ملحوظه : لغية ما سافرت السياره كانت عامله 700 كم منهم 67 كم قبل ما أستلمها ! و كمان زوجتى و أولادى ساقوها !

يعنى اختباراتى دى فى مشاوير قصيره داخل القاهره و مش مقصود منها اختبارها ! لذلك عنوان الموضوع " فى أول

700 كم " وان شاء الله كل ما أعرف حاجه ح أقولها ! ( يتبع ) !

Dr. Bolbolan ptmnlo123per122