[AbOnOrA]

بصراحة الموضوع بقى ملخبط خالص ومحتاج اعادة نظر فى اكثر من جانب

مبدئياً بالنسبة لما جاء فى مشاركة الاستاذ شادى من تعدى على عضو اخر فسيتم اتخاذ الاجراء الادارى وفقاً لقوانين المنتدى .

وقبل اى حاجة بشكر الدكتور تامر على فتح الموضوع والشكر موصول لكل المشاركين على اثراء الموضوع بالاراء القيمة

بالنسبة للموضوع فانا شايفه من اكثر من زاوية

اولاً كما ذكر استاذ شادى ان منظومة الضرائب اعادت جدار الثقة بين الممول والمحصل
وانا اسأل منين تيجى الثقة ؟
الثقة تيجى لما الممول يبقى عارف ان اللى بيدفعه بيروح لمن يستحق
يعنى انا بدفع ضرائب معقولة قدام خدمات ملموسة
حضرتك بتقول " الدولة بتاخد منك عشان تصرف عليك امن و دفاع مدني و صحة و تعليم وكل شيء"
امن يعنى ميبقاش فيه امين شرطة ياخد منك خمسين جنية علشان يعملك محضر زى الناس ومبيقاش فى حرامية وبلطجية فى كل حتة وكل مكان ومبيقاش فيه تجارة مخدرات فى كل حتة وعلى مرائى ومسمع واحيانا دعم من الشرطة
امن يعنى مفيش اسرائيل ويعنى عندك منظومة تسليح حقيقية
فين الامن ده ؟

دفاع مدنى ؟
يبقى حضرتك مشوفتش ومسمعتش كم الحرائق اللى حصلت فى السنة اللى فاتت بس ومتابعتش اداء الدفاع المدنى المخزى فيها فضلا عن كارثة الدويقة اللى الدفاع المدنى معرفش يطلع جثث الناس من تحت الصخرة لحد ما تعفنت

صحة ؟
يبقى حضرتك متعرفش اننا بقينا من اكتر الدول الموبوئه فى العالم مابين كل انواع الانفلونزا طيور وخنازير الى امراض الكبد والدم والايدز لسرطانات والقائمة طويلة ممكن الدكاترة يفيدونا فيها اكتر
ده غير مصايب التامين الصحى والمشتشفيات الحكومية وفضائح سرقة الاعضاء وكوارث المستشفيات الخاصة والاستثمارية

تعليم ؟
الحمد لله مفيش برضو لا تعليم ولا تثقيف ولا تربية

وزى ماقال دكتور عبد السلام اصلاً كل الخدمات ديه مدفوعة الاجر
يعنى انا بدفع للتعليم وللصحة وللمواصلات والكهرباء والمية والتليفون وكل حاجة ايه اللى عليه دعم ؟
العيش اللى محدش بيلاقيه ولا بياكله اصلاً ولا المستشفيات الحكومية اللى محدش يقدر يهوب جمبها ولا مدارس الحكومة اللى بتخيب مش بتعلم ولا ايه ؟

انت عارف ايه الحاجة اللى عليها دعم فعلاً الغاز اللى بنوديه لاسرائيل

انا عايز اعرف فين جدار الثقة ده بقى اذا كنت مش حاسس بقيمة اى خدمة باخودها فى مقابل الضرائب ديه ؟

ينفع اتنازلك عن كل الخدمات ديه فى مقابل انى مدفعش ضرائب ؟؟

ينفع اشترى عربية بضرائب هى الاولى من نوعها فى العالم كله فى مقابل الشوارع اللى زى الزفت ديه وخدمات المرور اللى تخرج الواحد من هدومة

طبعاً مفيش ثقة ولا فيه اقتناع بس بدام بقى فيها حبس يبقى لازم ندفع

اما الضريبة العقارية فعلشان نناقشها لازم نرجع سنتين ورا لما الحكومة باعت اجزاء كبيرة من الاراضى لمستثمرين اجانب وسهلت للاجانب عامة شراء الشقق والاراضى فزادت اسعار الاراضى والشقق اضعاف مضاعفة تمهيداً للقانون ودلوقتى بيستكملو اللعبة
وده اللى فات واللى جاى لسه
لان الاسعار بايديهم وممكن تانى برضو بين يوم وليلة تلاقى العقار بتاعك دخل فى الشريحة المفتكسة وده اكيد هيحصل لان كل حاجة بتزيد وبس ما عدا قيمة الجنية
هو ده بقى تحسين وتحرير الاقتصاد !!؟

وبعدين انا بتفرس بصراحة لما بسمع الناس بتردد الكلام الحكومى بتاع الازمة العالمية اللى احنا متأثرناش بيها الحمد لله والدنيا كلها مش لاقيه تاكول واحنا اخر حلاوة وبشبشه والفلوس مش عارفين نوديها فين

احنا اتأثرنا بالازمة طبعاً والحال مازال زى الزفت سواء فى البورصة او فى القطاع العقارى والقطاع الائتمانى والسوق عامة
هو احنا لازم تحصل مجاعة علشان يبقى اتأثرنا هو كان حصل مجاعة فى امريكا ولا اوربا ولا اسيا

يعم وصلنا لدخل ورفاهية الناس بره وبعدين دخلنا فى ازمة زيهم برضو انا موافق

بصراحة الموضوع الكلام فيه بيعصب والواحد مش قادر يتكلم بالمنطق بدون انفعال
فرحانين بجابى ضرائب شاطر ويقولك ده حرر الاقتصاد ونعنش البلد يا سلام امال اللى بيوفر ويدبر ويحاسب الكبار يبقى ايه
لاء يا سيدى انا عايز الاقتصاد يبقى مقيد والبلد تبقى متخلفة بس رخص الزيت والسكر اللى زادو اضعاف مضاعفة من ساعة ما ممسكت

ptmnlo123per1106