[خالدخليفة]

من زمان وانا غاوى اقرا اللى بيكتبه السواقين على الاكصدام من ورا او على البرابريز
خدو عندكو
1- ان عشت هذلكو وان مت الله يسهلكو ( ده غالبا سواق ميكروباس واكل مقلب وناوى ينتقم قريب )
2- عتاب الندل اجتنابه ( ده واحد واخد مقلب بس مش ناوى ينتقم )
3- مفيش صاحب يتصاحب ( ده واحد شبع من اصحابه فقرر ميصاحبش حد)
4- محمد ورانيا وتسنيم ( ده سواق تاكسى ربنا رزقه بال3 امامير دول وكاتب اساميهم باعتبارهم الورثة للتاكسى )
5- وكان ابوهما صالحا ( ودول غالبا اخين شركا فى العربية وابوهم الله يرحمه كان راجل طيب )
6- مع السلامة يا ابو نسمة (ده سواق بيجو بيتمنى لنفسه السلامة )
7-راجعة بأذن الله ( ده سواق لورى غالبا رخصه منتهية وخايف من اى كمين يقابله او عربيته مليانة عيوب او اى حاجة اواى كمين ممكن يتلككله )
8-انا مالى انت اللى غلطان ( وده سواق لورى اكصدامه حديد ومتين فبيعزيك مقدما فى عربيتك وبيفهمك انه ملوش دعوة وربنا يستر علينا جميعا)
9- من حق الكبير يدلع ( و ده غالبا سواق لورى او سواق ميكروباس 26 راكب شايف نفسه وسط الميكروباسات التانية كبير)
10-الكبير لما يتدلع يخلى الاسفلت يولع
11- اللى جاية دى بقى نكتة وانا شخصيا قريتها مت على روحى من الضحك وصاحبها مسكوه فى كمين لان الظابط اعتبرها اهانة ليه السواق كاتب ايه كااااااااتـــبـــــــ
اللى ورايا عبيط (هههههههههههههه)
12-الحلوة من بولاق وصاحبها راجل سواق ( طب م احنا عارفين انك سواق اومال ماشية لوحدها يعنى )
13- ربنا ولاتحملنا مالاطاقة لنا به ( وده سواق لورى بيوهم الكماين انه مبيحملش اى حمولة زيادة وطبعا ده استعمال خاطىء للآية القرآنية)
14- الكبير كبير والنص نص منعرفوش
15- اللمبى او ابراهيم الابيض او فالنتينو او بوحة او اى شخصية علقت مع الناس فى الافلام او المسلسلات يروح عاملها اسم شهرة لنفسه
16-وده سواق لذيذ تدخل العربية من جوه تلاقيه لازقلك استيكر مكتوب عليه
(الأجرة لو سمحت)
17 - ياناس ياشر كفايه قر
18-متبصلهاش ياعبيط الحلوة بالتقسيط
19- عضة اسد ولانظرة حسد
20-ياناس سيبونى اسدد ديونى (قال يعنى احنا اللى مزنقينها عليه)
21- وده فيلسوف كاتب ( ياسلام لو الناس تبطل الكلام )
22- و ده واحد واخد بومبة من حبيبته ( ياعبيط مفيش بت تستاهل (كاتب بت مش بنت )
23-لوح ازاز على لوح ازاز والحاج هيروح الحجاز
24-غير التقاليع بقى زمان كان يعلق الفردة الشمال من حذاء طفل فى الاكسدام اللى ورا واليمين فى الاكسدام اللى قدام علشان الحسد وياحظك لو ركبت تاكس وكنت اول زمان فى الوردية واللى تديهولو كتير قليل ميبصش فيه وانما يطبق ايده عليهم ويفضل يبوس ايده وش وضهر ييجى نص ساعة
25 - اللى جاية دى عجيبة ركبت تاكسى ولقيت مكتوب جواه ع التابلوه ( مش عاجبك انزل ) ولما سالت قال معرفش انا بستلم العربية كده واللى بيسلمنى مش فاهم وغالبا ابن صاحب العربيه هو اللى لازقها
26-اللى تعرفه احسن من اللى متعرفوش ( ومش فاهم علاقتها ايه بينا ك ناس ماشيين حوالين سواق الميكروباس اللى كاتبها )
27- لا امان للبشر
28- سولار فى التانك ولادولار فى البنك( ده بيوهمك انه قنوع وراضى بحاله )
اخيرا طب ايه سبب الموضوع انا بسأل هل ده بيعبر عن شخصية اللى كاتبها واللا هو بيقصد يخاطب شخص معين والا اسباب تانيه والا كلهم مجتمعين ارجو التفاعل واشكركم
موضوعــــــــاتــــــــــ ــــــــــــــــى

http://http://www.masrmotors.com/vb/showthread.php?t=17140
http://www.masrmotors.com/vb/showthread.php?t=18011
http://www.masrmotors.com/vb/showthread.php?t=17139
http://http://www.masrmotors.com/vb/showthread.php?t=17005