[sh_masry]

انا قريت كل الكلام الجميل ده طبعا بس برده ماحدش رد عليا ......
ايه هى الأوبشنس و الكماليات الرهيبه اللى فى الصينى ؟؟؟
التكييف ..... بقى ستاندرد فى معظم العربيات لكن بتاع الصينى مش بيسقع .
السنتر..... برده بقى ستاندرد و ممكن تركبه ب 150 جنيه (يعنى مش كماليات صعبه الأضافه).
الأنذار ..... نفس موضوع السنتر .
وحدات رفع الزجاج...... نفس موضوع السنتر و الأنذار .
الباور .... معظم العربيات دلوقتى بتزل بيه او بيبقى هاف باور فى اسواء الأحوال و اخف من الفول باور بتاع الصينى.
الزجاج الكهرباء .... برده عربيات كتير بتنزل بيه و لو مانزلتش فممكن تركبه و لو ماركبتوش مش ده اللى هايخليك تشترى عربيه صينى علشان يبقى فيها ازاز كهربا :-)
نيجى للمهم اللى هو ABS و ده مش موجود فى معظم العربيات ذات الفئه المتوسطه المحترمه و فى نفس الوقت الصينى اللى فيها ABS مش بالكفائه التامه بدليل ان كتير من الناس اشتكشت و بتقول العربيه لفت بيا او العربيه اتزحلقت و متهيألى كتير مننا سمع الكلام ده فبالتالى مش هاخسر فلوسى و اجيب عربيه صينى علشان اوبشنس وحيد زياده و غير فعال و اساسى .
وسائد هوائيه ..... نفس الكلام بالنسبه لل ABS و نفس الشكاوى ..... الوساده مافتحتش , او الوساده فتحت مع مطب عادى !!!!

يبقى ناقص ايه ؟؟؟
ناقص ان الوكيل اللى بيجيب العربيه الصينى يمد ايده فى جيبك و ياخد الفلوس و حتى ما يدكش عربيه تروح بيها و يقولك كفايه انك اتقرجت عليها علشان العربيات دى ما بتمشيش فى شوارع القاهره لأنها مش من مقامها هههههه

نرجع نقول ان المقارنه بين الكورى و اليابانى و الصينى ليست فى محلها اطلاقا بدليـــــــــــــــــــــ ــــل
ادخل على اى موقع اوروبى او امريكى هتلاقى العربيات اليابانى سعرها زى الكورى يعنى على نفس المستوى التقنى و العملى ...... و هنا انا ليا وقفه .. ليـــــــــــه ؟؟؟
لأن فى الدول دى العربيه ما بتعش مع حد اكتر من خمس سنين .... يبقى دى زى دى بالظبط .
و لكن عندنا عايزين نورث العربيه لولادنا وولاد ولادنا يبقى بالتالى اليابانى يتفوق فى العمر الأفتراضى فبالتالى سعره اعلى قليلا عندنا من الكورى و لكن بنفس الكفاءه و الأداء حتى فتره معينه من الزمن ........
و انما بالنسبه للصينى اساسا مابيدخلش البلاد المحترمه اللى بنتكلم عليها و بالتالى فهو مرفوض مرفوض يا ولدى .