شوفى يا ست البنات عايز اقولك على حاجة
اولا اشكرك على الكلام الجميل اللى قولتيه فى حقى واللى كتييييير عليا قوى
ثانيا الكون كله منذ الخلق حتى القيامة مقدر فى اللوح المحفوظ وهذا لا خلاف عليه
لكن فيه امور احيانا العقل البشرى الضعيف مابيقدرش يجد ليها تفسير وفقا لمقاييسه الكرية وخبراته الحياتية فاخترع كلمة صدفة علما بانها قدر ومكتوب
عندك مثلا السادات الله يرحمه ارتبط برقم ( 6 ) بشكل غريب أو ان الرقم هو اللى ارتبط بيه وطبعا كلها اقدار من الله سبحانه وتعالى
فمثلا في 6 فبراير عام 1938 تخرج من الكلية الحربية ..
وفي 6 يناير عام 1946 اشترك في اغتيال ( امين عثمان )
وفي 6 يناير 1950 عاد الى الخدمة في الجيش بعد ان طرد منه على اثر مصرع امين عثمان ..
وفي 6 اكتوبر عام 1973 قاد حرب اكتوبر ،
وفي 6 اكتوبر عام 1981 تم اغتياله
وفي 6 مارس عام 1982 صدرت الاحكام في قضية اغتياله ..
عندك كمان الرقم 7 فى الدين زاى 7 سماوات و7 اراضين والسبعة المنجيات
والسبع الموبقات والطواف حول الكعبة 7 مرات والسعى بين الصفا والمروة 7 مرات
و7 جمرات عند الرمى
وفى المعتقدات سبوع المولود فى اليوم السابع و7حبات من البقوليات ( فول وعدس وحمص ) اللى بتتعلق فى صدره يوم السبوع
والقطط اللى بسبعة ارواح وغيره كتير وده عايزله موضوع لوحده
وكمان حكاية الارقام فى القرأن وخصوصا الاحرف المنفصلة المتصلة فى اوائل بعض السور
مثل ( الم ) و ( الر ) و ( المص ) و ( كهيعص ) وازاى ان الحروف دى لما بتتذكر فى اوائل السور بيكون عدد تكرارها فى السورة الواحدة اكتر من باقى الحروف
مش كده وبس ده كمان ترتيب تكرار الحروف بيدل ايضا على ترتيب عدد مرات تكرارها فى السورة المذكورة فيها
وده كمان عايزله موضوع لوحده
وعندك موضع الرقم ( 13 ) واللى معظمنا بيتشائم منه ومش عارف ليه وبدون سبب وخصوصا الامريكان مع العلم ان عدد الخطوط الحمراء فى العلم الامريكى 13 خط !!!!!
وموضوع الرقم 23 واللى اتذكر كتير فى نبوءات نوستراداموس وارتباطه بعقائد اهل الهيمالايا فى اقتراب النهاية ويوم القيامة
وموضوع الرقم 11 فى احداث سبتمبر 2001
وحكاية الرقم 9 والغرائب اللى ممكن تلاقيها فيه فى الحساب والرياضيات
اذن الارقام ليها ارتباط بحياة الانسان وفقا لقدر معلوم عند الله
لكن بعض هذه الارقام قد ندرك الحكمة منه وبعضها لاندركه فيقوم العقل باختراع ما يسمى الصدفة ويفضل يفكر فيها ويسيب الحدث نفسه
وهنا بقى المصيبة ويبدأ التخلف والخزعبلات تشتغل
وناس تفكر وتركز فى حاضرها وتحاول فى نفس الوقت تلاقى تفسير وتقول اكيد فيه حكمة بس لسه ماجاش اوانها عشان نعرفه ويبدأو يبصو قدامهم للاهم
عشان كده بقى فيه ناس بقت قدام قووووووووووى وناس بقت متخلفة قوووووووووى
مع العلم ان الفرق بسيط جدا
ازاى نستخدم النعمة اللى ربنا انعم بيها علينا دون كل المخلوقات
الا وهى ...........العقل
فالموضوع اساسا انا مانقلتوش عشان نفكر فى الصدفة واتحسبت ازاى ومين حسبها
لكن عشان ممكن حوار زاى اللى اتفتح ده يوضح حاجات وممكن نعمل منها مواضيع تشغل العقل وتفتح المدارك يمكن نتعلم حاجة جديدة
اما بخصوص اسم اسامة اللى على ورقة ال 20 دولار طبعا هى مش مقصودة خالص
لكن فكرتها زاى فكرة لفظ الجلالة اللى مكتوب على الجنيه المصرى بتاعنا ( يا ترى عارفة مكتوب فين ؟؟!!!) مع الفارق طبعا ولله المثل الاعلى
برضه مش مقصودة لكن اهى من باب تشغيل الدماغ
لكن اللى صدفة ومش صدفة موضوع الفونت فى النوت باد !!!!
دى بقى لازم يتحط عليها 100 علامة استفهام ومليون علامة تعجب !!!!!!!
طولت عليكى انا عارف بس سامحينى
لما بلاقى حد بينكشنى ويخلينى اشغل دماغى مابعرفش افرمل نفسى - معلش ماعنديش ABS 