[kj1]

لما سوريا اسقطت مقاتلتين إسرائيليتين، ماسمعناش من النشطاء و المأجورين غير الصمت.. مع إن الخبر دا يسعد أي شريف، معتبر إسرائيل عدو، بيجور علي دول شقيقة، و بيحرك الإرهاب في المنطقة في حروب عصابات بالوكالة لا أول لها و لا آخر..
لما هاجم النشطاء الجيش المصري و طعنوا في مصادر دخله و ميزانيته، و حولنا المناقشة إلي الجيش الأمريكي، اللي بيضيع تريليونات هم نفسهم مش عارفين فين بالضبط.. فوجئنا منهم بدفاع مستميت عن الجيش الأمريكي...!
دا برضه مش مفهوم أبدا من ناس بتقول لنا طول الوقت "النظام المصري منبطح لأمريكا".. "النظام السوري عميل إسرائيلي".. إلخ...
لما الجيش الليبي استرد هلال النفط، فوجئنا بالصمت مرة أخرى...
صمت طويل حزين مغلف بالغيظ.. سببه مش مفهوم إطلاقا، لو عرفت إن الجماعة دول قالوالنا إنهم "ثاروا علي الأنظمة لأنها عميلة لأسرائيل"..
لما مصر قصفت داعش في ليبيا.. خرج علينا الجماعة إياهم يعيطوا و يبكوا علي الأطفال اللي مصر قصفتها...! مش عارف إيه الأطفال دي بالضبط و للا داعش فاتحة في معسكراتها حضانة و للا إيه ظروفهم بالضبط.. بس هو دا التصريح الكوميدي اللي سمعناه بالمللي وقتها...
لما روسيا قصفت الإرهابيين في سوريا، سمعنا الولولة و النحيب.. روسيا بتقتل الأطفال.. لأ دا التصريح الأكثر كوميدية اللي أطلقه حمير قناة الجزيرة كان: روسيا "تستهدف" الأطفال...
يعني لك أنت تتخيل "سيرجي شويجو" وزير الدفاع و هو بيخاطب قائد القوات الجوية الروسية و بيقول له: "إيه العيال اللي بتشتري عسلية هناك دي؟؟ إزاي سايبينهم.. دول لازم يتصفوا فورا".. فيتحرك الطيران الروسي يقصفهم..
دا يديلك فكرة عن مدي "الكفاءة العقلية" للسادة النشطاء و الثوار بأجر في فبركة الأحداث.. يعني مش بيديلك تصريح خارج حدود المنطق.. لأ دا خارج حدود العقل نفسه على الإطلاق...
امبارح اللي حصل إن القوات السورية كانت مشتبكة مع إرهابيين داعش.. فخرج الطيران الأمريكي و قصف القوات التابعة للجيش السوري.. و قالوالنا "ضربناهم بالخطأ.. لامؤاخذة"...