رد: ارتفاع حراره النيفا
بص يا ريس
هو أى عربية مش اللادا بس, المفروض ليها درجة حرارة معينه متزيدش - و لا تقل - عنها
و دى بتبقى من 80-90 درجة مئوية, و لو المؤشر بتاع درجة الحرارة عندك مش بأرقام يبقى المؤشر ميعديش النص, لو زاد لا قدر الله يبقى تركن على جنب و تشوف دورة التبريد على طول.
اللى فهمتة كده إن حضرتك عاوز تلغى ترموستات الكوعه و تركب المروحه على سير مباشرة مع طنبورة الدينامو, الحل ده خليه للآخر مش الأول, هو ده الأسهل من تغيير الريداتير, بس غلط, و مش بنعمله فى اللادا غير للإضطرار. هأقولك غلط ليه....
الموتور - سواء صيف أو شتاء- المفروض بيبقى ليه درجة حرارة ثابتة 90 درجة مئوية, و دى أفضل درجة حرارة عملتها الشركة علشان الموتور يشتغل بأفضل أداء ليه. التزييت كويس و إستهلاك البنزين ممتاز, لو قلت عن كده معناها إن التزييت مش كويس و الزيت لسه لزوجته عالية و مش بيزيت كل أجزاء المكنه من جوه, و هتلاقى الكربراتير كمان علشان بارد بيسحب هواء كثافته كبيرة (هواء بارد) و بالتالى بيستهلك بنزين أكتر, علشان كده الكربراتير يتضبط و هيا العربية سخنه.
طيب إحنا بنشيل المراوح الكهرباء و القميص و نوصل على الطنبورة مروحه بسير ليه.... أهم سبب علشان ترموستات الكوعه دى (اللى بتتحكم فى درجة الحرارة لا تزيد و لا تقل) ممكن تعلق و هيا مقفوله و ساعتها حرارة العربية تزيد بسرعه و تدخل فى حوار تانى .... عافانا الله منه.
=============== ده الكلام النظرى, العملى بقى:
أنا شارى العربية الترموستات ملغى بالفعل, المروحة 8 ريشة بتاعة فيات 124 بحوالى 12-15 ج, و السير مش فاكر دلوقتى بكام.
مش هتحس بفرق بين وجود الترموستات و عدم وجوده غير فى أيام البرد فى الشتاء, هتحس إن العربية مش عاوزة تسخن لو المروحه على سير, غير كده طول الصيف هيا هيا.
فى أيام الشتاء إتعلمنا من الإخوة سواقين التاكسى اللادا بيحطو حته كرتون أمام الريداتير (بين الريداتير و الشبكة) علشان يسخن العربية.
إطلع على البشمهندس محمد طلبه فى الوراق و إعرض عليه العربية, هيقولك الصح تعمل إيه حسب حالتها, و لو فيها أى حاجه تانية هيقولك, خليه يجربها بنفسه و خليك معاه و شوف هيقولك العربية محتاجه إيه و بكام.... و ممكن تتصل بيه بس و تسأله على إنت عاوزة و بالأسعار, عادى, أنا جربته و ناس كتير هنا جربوه و محدش إشتكى منه بفضل الله, و أمين جداً لو العربية مش محتاجه مبيعملش شغل, و أسعارة فى المتوسط و الميزة إنه بيجيب قطع الغيار على ضمانته, طبعاً الأصلى أو الأفضل جوده لو الأصلى مش موجود فى السوق, يعنى مش هيقولك أصل قطعه الغيار مضروبه, هو اللى جايب و هو اللى مركبها, ريح دماغك.
أعانك الله
__________________
|