[doda2007]

بسم الله الرحمن الرحيم ردي هيكون على اكتر من جزء واعتذر عن طوله لكن احقاقاً للحق وادحاضاً للباطل ( الصور بالاسفل ) اولاً : ( الوم علي منتدي نايل موتورز علي ايقاف عضويتي بعد رد فعل علي من لفق لي بأني موزع لزيت اخر واني بجروب لانوس وترك الفعل ( التلفيق - والادعاء ) والتعامل مع رد الفعل ( الدفاع عن النفس والحق ) لاني اقسم بالله انا لا عضو فى جروب لانوس ولا عمري بعت زيت .. واشكر الادارة ايضا لمنح لي مجال للرد بعد الملامه علي عدم اتخاذ الاجراء اللازم مع موزعي الزيوت الذين يلفقون على عضو له الحق في نشر تجربته فقط لانهم اعضاء اقدم ويشكرون فى الزيت فقط لزيادة مبيعاتهم . ثانيا : وصلت لي رسائل تهديد شهصي بسبب نشر تجربتي التي يشهد الله عليها والعديد من اصدقائي ، ايضا هجوم شرس علي شخصياً ، وايضا وجدت رسائل دعم لي على ما تعرضت له من ظلم في نايل موتوروز الذى يحق لي ان انشر تجربتي الكاملة فيه . ثالثا : انا محمود احمد موجود علي الانترنت منذ عام 2002 وكنت اعمل بمجال استضافه وتصميم وبرمجه المواقع ( العبره هنا ليست بالاقدميه ) ..، تكلمت ايضا بخصوص عضويتي الجديدة باني اتابع نايل موتورز منذ عامين ولم اشترك لانه لا يشترط التسجيل لمتابعة المواضيع او الردود ، وعند حاجتي لفتح موضوع اشتركت بالفعل والجميع يعرف ما اقدمه وما قدمته لمجال التصميم والبرمجه في الانترنت منذ 13 عاماً وتستطيع البحث فى جوجل عن اسم عضويتي وايضا فى اليوتيوب .. والحمدلله رابعاً : وفي الموضوع نبدء نتكلم ونحكي القصه من الزيرو ولكن مبدئياً ( لقد علمت مؤخراً بان نايل موتورز بها موزعين اكابر لزيت زادو xado لها السبب تأكدت 100% بأني سأفقد العضوية قريباً 1- ما حدث معي بالتفصيل : تم طلب زيت زادو من الوكيل الرسمي الذى ينتهي رقمه بـ(2323) وهو يعلم ذلك جيداً ، وو من رشح لي زيت نصف تخليقي اكسترا درايف extra drive 10w - 40 ، بناء على ما قدمته له من بيانات تخص سيارتي الاسبرانزا 516 عداد 82 الف كيلو ، لم يصل الزيت وكلمته مره اخرى للتأكيد عليه بأني انتظرت الزيت للتغير واخبرني بأنه سيصل قريباً ، وصل الزيت بالفعل يوم 25\5\2015 استلمت الزيت من مندوب شركة ايجيبت اكسبرس وعند مطالبت المندوب ببوليصة الشحن لم يوافق وقال هذه البوليصه للشركة ولا يتم تسليمها للعميل ، دفعت 255 ج ثمن ( 4 لتر + 1 لتر ) كما قال لي الوكيل بالحرف .... فتحت التغليف الخاص بشركة الشحن ووجدت جركن كبير 4 لتر وجركن صغير 1 لتر ولازقه زادو وكارت لتسجيل العداد وبورشور دعائي للزيت ، اول ما فعلته هو النظر على تاريخ الانتاج للزيت ووجدت تاريخ انتاج الجركن الكبير 2012 والجركن الصغير 2010 مما استدعاني للقلق الشديد وتم الاتصال بالسيد الوكيل وهو حي يرزق ويرى ما اقول ، تم الاتصال به الساعه 6:48 م نفس اليوم واخبرته بوجود ان تاريخ الانتاج قديم وتاريخ اللتر 2010 قديم جدا { طبعا مع وجود رائحه غريبه تخرج من الجركن تنم عن سوء تخزين شديد في الجو الحار ومع خفه شديده فى البلاستيك لدرجة عند الضغط عليه بخفة شديده بيتني ف ايدك البلاستيك تحسه دايب كدا } طبعا اتصلت بيه وقال لي بالحرف ( مفيش مشكلة يا باشا غير عادي جدا اصل دول كانوا اخر حاجه عندي ولسه واصلني حالا بضاعه بتاريخ جديد وغير الزيت ومتخفش وميهمكش حاجه وهتلاقى العلبه مكتوب عليها صلاحية 5 سنوات يعني لسه قدامك شوية ومش تقلق ) قولت له بالحرف ( يعنى كان لازم تبعتلى حاجه تقلقني بتاريخ قديم ) ، قالي ( معلش يا باشا لسه واصلني حالا تاريخ جديد غيروا ومتخفش من حاجه وانا بعت لاكتر من شخص نفس الكلام ومتخفش ومتقلقش ) ... انتهت المكالمه مع وجود القلق لدي فكرت في اخذ المشورة من الاخوه بجروب الاسبرانزا والجروب الاخر للأسبرانزا حتى يطمئن قلبي وشاركت الاخوه بالجروب في بوست كالتالي ولم اذكر فيه اسم الزيت لعدم التشهير به او ظلمه ( انهرده وصلني زيت بتاريخ 2012 و2010 هل ينفع احطه عادي ولا ممكن يأثر على الموتور ؟) ، وكانت ردود الاعضاء قوية _ غلط جدا تحطه فى الموتور _ ايه اللى يخليك تدفع فلوس على زيت منتهي _ ايه نوع الزيت دا _ رجعه احسن_ ، المشكله كانت انى من الصعيد بعيد عن القاهره فكان صعب اختيار الترجيع اساساً بالنسبه ليا ... ( قولت لنفسي مش معقول يكون مضروب ده من الوكيل نفسه واكيد حاجه نضيفه ) رحت تانى يوم نزلت الزيت ونضفت الفلتر وحطيت الزيت الجديد ومشيت نص ساعه واللمبة اول مره من ساعت ما شريت العربيه تنور وصوت تحذيري مقلق فضلت ماشي عليها شوية قولت يمكن تطفي .. كلمت وقتها الاستاذ عمرو البياع من جروب الاسبرانزا وحكيت له اللى حصل قاللى غير فلتر زيت وفعلا غيرت الفلتر واللمبه طفيت ربع ساعه ورجعت تنور تاني وصوت تحذيري والعربيه بتسخن وبتطلع حراره من الجناب ومن ناحية الكبوت وصوتها علي .. ركنت العربيه لتاني يوم وكشفت عند ميكانيكي علي ساعه الزيت وكبس طربمة الزيت وطلع سليم فتحت الغطا بتاع الزيت والزيت بينتر منها يعنى الطربمه سليمه والساعه سليمه امال ايه المشكله ؟! وكشفت كمبيوتر !!! والمقاس مظبوط !! ، قولتله طيب ادي بصه على الزيت كدا اول ما شم ريحة الزيت وشاف لزوجته من غير ما يعرف نوعة اساساً قالى مضروب يا باشا وعوضك على الله ، طبعا مصدقتش ومش رضيت اظلم الزيت ونفسي حد يقولى ان الزيت كويس والعيب من حاجه تانى عشان ما احسش انى خسرت كتير وما احسش انى اتخدعت روحت كشفت عند اكتر من ميكانيكي ومتخصص وللأسف كلهم اجمعوا على ان الزيت مضروب من غير ما يعرفوا نوعه حتى!! ، جبت اتنين اصدقائي مهندسيين ميكانيكا قولت يمكن اللى فاتوا كلهم مش بيفهموا ودول يقولو كلام تانى للاسف قالولى بردو مضروب وغيره بسرعه قبل ما تحصل حاجه ، خدت بعضي ونزلت الزيت وحطيت شيل احمر لتنظيف الموتور واول ما غيرته علطول اللمبه سكتت والعربيه ارتاحت والصوت هدي واللمبه مش نورت والحراره اختفت {{ لما نزلت زيت زادو كان نازل اسود بعد 1 يوم من استخدامه وده بخلاف اللى بيقولوا بيقعد معانا 20 الف كيلو و100 الف كيلو ! ، الزيت نازل اسود واللزوجه قليله جدا بعد 10 كيلو و1 يوم ياجماعه استوعبوا الموضوع ) وبعد ما غيرته علطول العربيه ارتاحت خالص ورجعت الحمدلله الحمدلله سليمة . 2 - نشرت التحذير لباقي الاخوة فى جروب الاسبرانزا لان مواتيرنا احنا الاسبرانزا غاليه جدا ومكلفه ومينفعش يضيع ماتور كامل يكلفني 12 الف فى لحظه عشان الباشا بتاع الزيت المضروب يفرح ويتمتع بفلوسنا ! ، وصلتلى رساله انى احذر فى باقى الجروبات وبالفعل عملت كدا ونشرت فى الجروبات اللى انا فيها ومعظم انواع العربيات وسبحان الله سبحان الله ( الا اللانوس لانى مش مشترك في ولا جروب لانوس ) عشان الاخ المدعي بالباطل عليا انى كنت ببيع زيوت عنده ! ، وناس كتير اتجاوبت معايا وناس كتير حكت تجربتها وناس كتير قالت انها مرتاحتش للزيت وغيرته وفيه بردو ناس بتشكر فى الزيت بس للاسف معظم اللى بيشكروا كانوا موزعين للزيت مش ناس محايده ، واتهاجمت منهم هجوم شرس انى بهاجم الزيت وانى خاين وانى عميل لزيت اخر ، مع انى من حقي الكامل نشر تجربتي التي كلفتني 550 ج وليس من حق احد اياً كان ان يحجر على رأي وتجربتي ويحكم عليها بالخيانة ؟ ( زي ما انت يا حبيبي بتشكر فى الزيت وانا مش حكمت عليك انك بتكذب يبقي مش من حقك تحكم عليا فى تجربتي اللى كلفتني فلوس مش لاقيها ف الارض ) وفلوسنا يا جماعه مش لاقيينها فى الشارع عشان يجي موزع مشهور فى نايل موتورز بكل بساطه يقول كلام باطل عشان بس يدافع عن حاجه هو بيبعها ، واتحداه ( lanos - mizo ) واتحدى جميع الاعضاء ان حد يجيب ربع دليل على انى ببيع زيوت او انى بهاجم الزيت او ان تجربتي دى كلها محصلتش واعرفوا كويس ان صاحب الحق عينه قويه جدا والحمدلله مبخفش فى الحق لومه لائم .. انا والله بضيع ال 550 فى اليوم بس في المكان الصح وفى الحاجه الصح ومش عندي حنفيه بتنزل فلوس اصرفها على الزيوت المضروبه وعلي اى نصاب يفرح ويدلع على قفايا ، وانا مش عايز تعويض ولا اى حاجه وقولت وقتها حتى لو اعتذرلي الوكيل وقالى دا خطأ من عندي وهصلحه او مش هصلحه ، كفايه الاعتذار فى حد ذاته كنت هعدى وكأن محصلتش حاجه لكن دلوقتى اتغير خالص الحال لانها مبقتش مسأله اعتذار دى بقت مسأله غش وضحك ع الدقون . 3 - الزيت ملوش اساساً وكيل في مصر وده من موقعهم الرسمي العالمي ، مفيش اى وكيل فى افريقياً كلها ولا مصر ولا يحزنون ومفيش اى وكيل عربي اساساً الا الامارات ، وبالنسبه للأخ اللى بيحلف ان مفيش عبوه لتر وبيقسم وهيموت من الحلفنات والايمانات .. اظن انك عارف كويس اوى دلوقتى فيه عبوه لتر ولا مفيش . 4 - الاخ الموزع المشهور اللى بيدافع عن الزيت باستماته وقام بالادعاء على شخصياً ، اوعو تفتكر انت او صديقك انك هتقدر تكتم الحق بأقدميتكم فى المنتدي او بعلاقاتكم ، مش مهم العضوية قد ما مهم ان الناس كلها تعرفكم وتعرف انى صادق وبيدعمونى وعارفني انى مظلوم ، وانا اطالب ادارة المنتدي المحترمه بأتخاذ اللازم بناحيتكم ، لانكم تستغلون عضويتكم فى المنفعه الشخصية وفى التربح من زيوت مضروبة على حساب باقى الاعضاء والزبون الغلبان ، واطالب الادارة مره اخري برد حقي لانهم ادعو علي بانى موزع زيت ومطرود من جروب لانوس بسبب حقد على الزيت ! ( مع انى ولا اعرفهم ولا عايز اعرفهم اساساً ) ** والجروب الوحيد اللى خرجوني منه انهرده كمان مش من زمان ولا حاجه جروب الامجراند عشان الادمن صديق الوكيل ( باعترافه شخصياً ) ، وبمزاجه مسحني وعملي بلوك شخصي! ومسح البوست اساساً ( واظن الناس عارفه الجروب دا كويس لو حد قال كلمه تخالف مزاجهم بلوك علطول ) ملخص شامل لما اقول : 1 - احذر الاعضاء والزوار المحترمين بان هذا الزيت مضروب 100% ونزلته بعد 10 كيلو اسود ولزوجته بسيطه جدا ريحته تقرف . 2 - قبل تغير زادو لمبة الزيت مش بتنور والحراره زى الفل والعربيه رايقه وعسل ، عند تغيير زيت زادو لمبة الزيت نورت والحراره زادت وصوت العربيه علي ، وبعد ازالة زيت زادو العربيه رجعت الحمدلله سليمة 3 - هتلاقى موزعين مستترين بيشكروا فى الزيت وخلي بالك كويس جدا . 4 - موقع الزيت الرسمي العالمي الاجنبي بيقول ان مفيش وكيل اساساً فى مصر ، والوكيل الوحيد العربي فى الامارات .. يبقي وكيل مصر جه منين ؟ 5 - والله العظيم مليش اى مصلحة وخسرت 550 ج وعضويتي جديدة لان نايل موتورز لا يتطلب التسجيل لرؤية المشاركات وانا اتابع نايل موتورز منذ عامين . 6 - اطالب ادارة المنتدي برد حقي واتخاذ اللازم جراء التعدي على حقي والتعدي على شخصي وعدم ترك الفعل والامساك في رد الفعل ونكون محايدين وننصر الحق ولا نصفق للباطل . 7 - الزبون دايما على حق مش الموزع . 8 - وتذكرت كلمة احد موزعي الزيوت قال لي ( اتعرض عليا زيت زادو ورفضت نهائي التعامل مع مثل هذه الانواع من الزيوت التي يتم تعبئتها تحت بير السلم ، وانا مستعد الان اضربلك زيت ونخليه صنع فى اليابان) ! واخيرا اللهم لا شماته لأيقاف عضويتي والحمدلله انا نشرت البوست فى صفحات بها نصف مليون معجب ، واذا زاد الامر عن حده لن اسكت ، واتمنى من ادارة المنتدي حفظ حقي في غيبتي وعدم وجودي والا الرد مكاني ... ولن اسامح من قصر فى حقي وفى حق هذا الموضوع وحق ما اقول واشهد الله الان على ما اقول واشهد الله ايضا على كذب الادعاءات ، وحسبي الله ونعم الوكيل في كل من ظلم وساند ودعم الظلم . مرفق صور صورة للعبوة عند استلامها وما يوجد معها ( والعبوه اللتر التي ادعي الاخ المدافع المستميت بانى كاذب وانها غير موجوده ) صوره لي عند كتابه البوست ولم اذكر اسمه وتاريخه وتاريخ تعديله بعد اكتشاف انه مضروب وذكر اسمه صورة اخرى للاستاذ عمرو البياع لما شكرلي فى الزيت جدا وقالى استخدمه على ضمانتي شخصياً ** صورة مهمه جدا لشخص اخر فى نفس اليوم وصل له تاريخ انتاج لتر 2010 و4 لتر 2012 وبنفس تاريخ استلامي صورة اخري لمشكلة لمبة الزيت ورد الاخ اللى انقذني وخلاني ابدء ابحث عن مشكلة الزيت صورة للوكيل نفسه يذكر سعر العبوه اللتر ويؤكد على وجودها بعكس ما تم الادعاء علي به انى كاذب ..الخ ** صورة من الموقع الرسمي تؤكد بعدم وجود وكيل اساساً فى مصر او فى افريقيا ولا يوجد وكيل الا فى الامارات يبقي بتاع مصر جه منين بس صورة لبعض ( وحط خط تحت بعض وعندي كتير بس مش موضوعنا يعنى ) اراء الناس فى الزيت هنا بقي الصورة اللى فيها ادعاء الاخ هو وصديقه عليا والرجاء اتخاذ اللازم من الادارة لان هوا ده الفعل اللى انا اتعصبت ورديت بكلمة كاذب ( اللى عملولى عليها ايقاف ) واشكر كل من وقف بجانبي حتى بدون ما يعرفني واشكر كل من قال كلمه حق فى وجه اى حد ولم يخف من اغلاق عضوية او التآمر عليه .. واحي الجميع والحمدلله الذى لا يحمد على مكروه سواه

انا اخدت الرد فى نايل موتورز كوبي وباست هنا واشكر ابو نورا على عدم اغلاق عضويتي مثل ما فعلوا فى نايل موتورز وهذه شهاده مني شخصياً على ان مصر موتورز منبع اكبر للحريات والاراء واتمنى عدم التعدي من نفس العضوين ( Lanos - mizo ) هنا مثل ما تعدوا علي فى نايل موتورز لانى لن اسكت عن حقي ومن يتعدى خطوطه معي سينال ما لا يعجبه .