[حازم شاهين]

طبعا الأخوة قالوا كل حاجة تقريبا
و الخوف و القلق ده طبيعى بيقل شوية شوية مع التعود على العربية و التعرض لمواقف أكتر
مش إنت لواحدك كده لكن الأغلبية كانت بتخاف و تقلق لما تيجى تسوق
أنا كمان عندى نصيحة ممكن تجربها
ما تعودش نفسك تسوق لما يكون عندك مشوار بس
بالعكس جرب تسوق العربية و إنت فاضى خدها لفة
جرب تتمشى بيها
أو تتفسح
جرب تسوق و إنت مش مشغول بأى موضوع و مواراكش مواعيد و مانتاش قلقان من مكان الركن
جرب تسوق و إنت رايح تتعشى عشوة حلوة أو و إنت خارج جرب تروح بالعربية لمكان بتحبه
و مايهماكش لو حصلك أى موقف أتخن تخين بتحصله مواقف أتخن تخين العربية ممكن تعطل منه وسط الطريق أتخن تخين ممكن يحك عربيته فى أى حاجه أو الناس هى إللى تحك بيه
أهم حاجة بس تخلى قلبك كبير و تراعى إن الناس إللى ماشية على رجلها دى بشر من لحم و دم و إنهم أضعف حاجة فى الشارع و إن فيهم التعبان و العيان و المقهور و الغلبان و الحران و العطشان و الجعان يعنى حن عليهم شوية علشان ربنا يكرمك
و بالتوفيق إن شاء الله