[AbOnOrA]

احمد باشا اولاًُ اهلا بيك فى مصر موتورز ومن الواضح فعلاً انك انسان محترم ومسئول وياريت كل الناس تفكر وتحس زيك وانا عايزك تتأكد انك هتكون سواق ممتاز لان الحرص وحسن التقدير اهم شىء فى السواقة اما المهارة بتكتسب بالممارسة سريعاً

بالنسبة لكون احساسك ده طبيعى فهو فعلاً طبيعى عند اكتر الناس انا مثلا كنت بسوق من الاعدادى لكن لما اشتريت عربيتى وكانت لسه زيرو كنت بحس بنفس احساسك من خوف من المواقف الطارئة او الصعبة اللى ممكن تخلينى ازعل على عربيتى وهى لسه زيرو وكنت حاسس ان لو طاسه وقعت ولا اكصدام اتشرخ هتزعلنى جداً لدرجة انى كنت اغلب الوقت بسوق على السلانسية ومكنتش بجرى ابداً وكنت بعود نفسى اراقب المرايات (التلاتة) كل كام ثانية وادى الاشارات قبل ما اكسر بدقائق واقرب الكرسى جداً من الدريكسيون والفرامل يااااه كان ايام رعب خاصة انى عملت حادثة كبيرة وانا صغير واتحرمت من السواقة بعدها فترة كبيرة خلتنى فعلاً مرعوب من السواقة

بس بالوقت والممارسة ابتديت انسى تماماً والموضوع بيبقى اعتيادى وتلقائى تماماً

فانا بالعكس انصحك انك تسوق لفترات طويلة وجرب تخلى واحد من اصحابك او اخواتك جمبك وخد يوم كامل فى الشارع خلص مشاوير زور قرايبك صل رحمك زور اصحابك قضى مصالح للعيلة المهم تمارس اكتر هتتعب كام يوم الاول وبعدين هتنسى مخاوفك ديه كلها ان شاء الله

واهلاً بيك مرة تانية وفىانتظار مشاركاتك دائماً