السلام عليكم ورحمة الله وبركاته
معايا سيارة أوبترا 2009 بقالها معايا أربع سنين ،، كانت مثال للسيارة الأصيلة ،، عمرها ما عملت معايا أي مشكلة .
لكن فجأة وبدون أي مقدمات ،، حسيت برجرجة خفيفة كده لما أكون على الـ D بس واقف في إشارة مثلاً.
على الفور رحت التوكيل أكشف على العيب ،، وانا رايح لقيت الرجرجة دي زادت شوية ،، ومابقاش فيه استجابة لما أدوس بنزين ،، لغاية ما وصلت التوكيل .
وأخبروني هناك إنها عاوزة عَمرة ..
طبعا كانت صدمة ،، لإنها بلا أي مقدمات ،، وقالولي العَمرة هاتتكلف حوالي 11 ألف جنيه .
طبعا أخدت العربية بالونش ورحت عند ميكانيكي ،، قاللي هي فعلا عاوزة عَمرة ،، يا إما نشتري موتور استيراد لإن العَمرة مهما كانت مش هاترجّع العربية زي الأول .
المهم ،، خليته يشتري موتور بـ 4000 جنيه
وهو أخد 400 جنيه مصنعية
وركب الموتور الاتسيراد وقاللي الورق بتاعه هاييجي بعد أسوبعين
فات أسبوع دلوقتي ..
لاحظت الآتي .. فيه رعشة كده او اهتزاز باحس بيه في رِجلي وانا دايس على دواسة البنزين .
قاللي إنها بسبب إن الموتور ده مش قاعد مرتاح وإنه هايخرط حاجة في القاعدة ،، وخرطها فعلا ،، بس ماراحتش الرعشة دي ،، بس خفّت شوية .
وبقالي يومين بلاحظ إن فيه زي ترشيح زيت كده على وش الموتور من فوق .
انا خايف يكون الموتور الجديد يكون خفيف والميكانيكي بيعمل عليا مصلحة ،، خصوصاً إنه وضع له زيت 50 وليس 40 كما هو متعارف عليه ،، ولما سالته ليه حطيت زيت 50 ( تقيل ) قاللي أنا جبت زيت 3 آلاف كيلو فقط عشان كده كده هانّزله بعد 1000 كيلو ونحط زيت تاني .
أنا عاوز حضراتكوا تفيدوني في :
- هل كده الموتور خفيف فعلاً
- هل الرعشة دي سببها القواعد زي ما بيقول مع العلم إن فيه واحد قاللي المفروض أروح التوكيل يعمل Reset لبرمجة العربية ،، وساعتها الرعشة دي هاتروح وآداء الموتور هايكون أحسن ؟
- لما باقيس زيت الموتور بيطلع في المنتصف بين الـ Min و الـ Max بالظبط.
- وهل ورق الموتور ده بيتأخر ،، ومصاريفه كام ،، والمفروض أعمل إيه لما ييجي ،، مع العلم إن الرخصة لسه فيها سنتين ونصف .
وشكراً مقدماً .