![]() |
هااام جداً ضروري : تيجو 1600 ولا m11 ولا أفيو أوتوماتيك 2013
بسم الله الرحمن الرحيم
بداية .. ده أول موضوع ليا في منتداكم الكريم أتمني تقبلوني بينكم نستفيد من خبراتكم إن شاء الله أكيد أي حد هيقرأ العنوان هيقول إيه اللي جاب التيجو للأفيو للـm11 ؟! انا عارف و متفهم .. بس خدني علي قد عقلي :) دلوقتي أنا محتاج عربية علي قدي في رينچ ما بين 70-90 ألف .. و أنا لسه بدرس في الجامعة و قدامي حوالي 5 سنين بطولي إن شاء الله انا هقولكم احتياجاتي و تفكيري و ساعدوني ينوبكم ثواب اولا انا مبحبش اجري بالعربية و مبطلعش علي طريق سفر غير نادرا جدا جدا و معاملتي للعربيات في السواقة كويسة جدا و بصون العربية اللي راكبها و سبب تحديدي للـ3 دول بالذات هو إعجابي الشديد بالـm11 و إعجابي بتحفظ بالتيجو ، و رضايا بالأفيو الي حد ما بين نظيراتها من عربيات لا اطيقها زي الفيرنا و اللانوس و اللوجان - مستحيل افكر فيهم علشان اوفر عليكم العروض D: - فبالتالي أنا مش هطلع عن الـ3 إختيارات دول ، كان نفسي ابعد عن القرف ده كله و اجيب حاجة نضيفة بس الظروف حكمت المهم زي ما قلتلكم أنا شاب لسه بدرس و انا الوحيد اللي هحط رجلي في العربية و يا دوب مشاوير الكلية علي كام مشوار جوة البلد ، ولا هلف بيها ليل نهار ولا هسافر بيها علي طريق غير نادرا .. و معايا والدي و والدتي ممكن اوصلهم مشاوير كل فين و فين يعني العربية اللي هتيجي مش هتتهان ولا هطلع عنيها .. فبالتالي انا عايز عربية متطلعش عيني خصوصا إني محتاج عربية تعيش معايا مش اقل من 5 سنين و يمكن اكتر لحد ما ربنا يفرجها و نشوف الدنيا هتمشي ازاي كل واحدة من دول كعبها عالي علي التانية في حاجة من وجهة نظري .. انا واحد من الناس اللي بيحبوا منظر العربية يكون حلو .. بس مش معني كده إني اجيب عربية تقرفني و اعيط جنبها بعد شهرين لمجرد إن شكلها عاجبني خليني امسك عربية عربية و اقول وجهة نظري من حيث المميزات و العيوب بالنسبة ليا مش هبقي جاهل و أقول خايف من الصيني علشان "صيني" ! ، بس التيجو سامع فيها شكاوي للركب .. لدرجة إني لما بشوف حد راكب تيجو في الشارع بيصعب عليا .. سواء فرامل سواء فتيس سواء عفشة سواء تقفيل .. حاجة ترعب خصوصا و إني محتاج عربية تعيش و مصرفش عليها اللي كان ممكن ازوده دلوقتي و اجيب عربية نضيفة. و في نفس الوقت شايف إن فيها مميزات عاجباني من حيث شكلها و ارتفاعها و وسعها و الأوبشنز ، تحس إنك راكب عربية بمعني الكلمة .. ده غير الأمان من حيث الثبات و الفرامل ABS , EBD لو رحنا للـM11 .. عاجباني جدا جدا جدا كشكل من برة و من جوة .. ثبات و تقيلة و سحبها حلو و عفشتها مش خشنة و اوبشنز و ABS , EBD .. تحس انها كمنظر سعرها قليل اوي عليها تعالي اتكلم هلي عيوبها .. اكيد منكم نستفيد .. بس مفيش اتنين معاهم العربية و سألتهم عليها و إتفقوا .. في اللي يطلعلي بيها السما و في اللي يسب و يلعن اليوم اللي جابها فيه ، من حيث التقفيل و التوكيل و قطع الغيار و ضعف التقفيل من جوة و علي حد تعبير البعض لعب اطفال .. لو جينا للأفيو .. بالنسبالي انا شايفها شاهين بباور و تكييف ! ، مبعترفش بيها كعربية من حيث الشكل و اكيد من حيث صفر الأوبشنز .. مشاكلها سمعتها سابقاها كل ما تجيب لحد سيرتها يهب في وشك .. معرفش هل عن علم ولا اشاعات الله اعلم ، ده غير إن مفيهاش اي وسائل امان و فراملها عادية مفيش ABS, EBD ، و حتي مفيش ريموت سنترلوك بس في نفس الوقت عربية منتشرة و بقت تاكسي دلوقتي و تشيل و تحط فيها عادي و كمان لو جبتها هجيبها اوتوماتيك يعني اريح في السواقة جوة البلد في الزحمة و قطع غيارها علي الأرصفة بملاليم .. انا بجد تايه و محتار و في نفس الوقت مستعجل ، علشان كده جيتلكم مش هلاقي احسن منك يساعدني ، ايه رأيكم أخلص في ايه ؟ عايز آرائكم بس بالله عليكوا بلاش ابعد عن الصيني أو بلاش الأفيو و الكلام ده يا ريت اللي يساعدني يكون عن علم و مجرب بنفسه او علي الأقل عارف حد مجرب العربيات دي رجااااء علشان انا سمعت كتير و كله كلام مختلف لما هتجنن ، فينوبكوا فيا ثواب ساعدوني و ربنا يجازيكوا خير يا رب و يا ريت اللي يرد يقولي هو شايف ايه في التلاتة من حيث المميزات و العيوب لاني معرفش برضه و منكم نستفيد و شايفين ايه فيهم الأنسب ليا بظروفي اللي شرحتها دي ان العربية علي قدي لوحدي تقريبا.. معلش طولت عليكم سامحوني و شكرا مقدما :) |
رد: هااام جداً ضروري : تيجو 1600 ولا m11 ولا أفيو أوتوماتيك 2013
بص يا باشا.. أنا هاكلمك على اللي أعرفها بس وهي الأفيو وأنصحك تبعد عنها نهائي لكثرة مشاكلها مثل عدم ثبات الأر بي إم بدون حل من الوكيل.. ومشكل المساعدين والعفشة بشكل عام.. إلخ
|
رد: هااام جداً ضروري : تيجو 1600 ولا m11 ولا أفيو أوتوماتيك 2013
السلام عليكم لو هتدفع الفلوس كاش حاول تفكر في الألنترا 2009 او 2010 فيها اوبشن وحافظه نفسها وقطع غيارها متوفره واعادة البيع سهله ومشاكلها قليلهROSE4U والله المستعان |
رد: هااام جداً ضروري : تيجو 1600 ولا m11 ولا أفيو أوتوماتيك 2013
التلاتة وحشين بس حسنهم التيجو :THE_PR~18::THE_PR~18::TH E_PR~18:
|
رد: هااام جداً ضروري : تيجو 1600 ولا m11 ولا أفيو أوتوماتيك 2013
هحاول اخلص في نيسان صني و ربنا يكرم ! اكيد احسن من التلاتة حتي بعيوبها !
|
الساعة الآن 08:23 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017