مصر موتورز مجتمع السيارات

الاخوة الاعضاء سلام عليكم . اليومين اللى فاتوا وانا بادور على حاجات ل 127 وخصوصا المراية اليمين ولقتها والحمد لله خطر ليا خاطر غريب شوية هشرحهولكوا كده براحة انا لاحظت ان السيارات تشبه الكائنات الحية ليها اماكن تواجد واماكن ندرة يعنى ايه مش مثلا يقولك حيوان الباندا انقرض ومعدش فاضل غير كام واحد فى البلد الفلانية والحيوان الفلانى يكثر تواجده فى البلد العلانية كذلك كنا بناخد زمان فى الجغرافيا خرايط للهضاب والسهول ونفس الخريطة بس مبين عليها مكان الامطار وهكذا . فانا لاحظت مثلا ان السيارة ال 124 الفيات منتشرة جدا فى الاسكندرية وفى طنطا وشغالة تاكسيات زى الفل ولما تركب واحدة منهم تستغرب من حالتها طبعا اللادا برضه فى اسكندرية زى الرز وتاكس برضه . لما تخش بقه منطقة قبلى فى اسكندرية تلاقى ميكروباس واحد بس اسمه دايهاتسو وزى مايكون محرجين عليه يطلع بره منطقة قبلى وماتلاقيهوش فى بلد تانية بهذه الكثرة . فى ال البيجو 504 دى بقى فى بور سعيد مالية الدنيا وعاملين فيها كل حاجة . عندك مثلا عربية نقل اسمها بدفورد منين ماتشوفها اتحداك لو مكنش عليها نمر البحيرة . ولما تنزل بقى ميت غمر (بس الكلام ده من فترة ) تلاقى ميكروباص واحد بس شكله زى بتوع الجيش
المهم طبعا دا فى حدود الكام محافظة اللى انا روحتهم فقلت طب ليه الاخوة الافاضل فى المنتدى مايعملوش زى ملف كده يبدأوا يجمعوه واحدة واحدة عن الاماكن اللى بتشتهر بعربيات معينة ومع الوقت هيبقى عندك زى خريطة تعرف منها مكان كل حاجة لان طبيعى المكان المتواجد فيه السيارة هتلاقى فيه قطع غيارها وبكده هنوفرررررر وقت كبير على الناس اللى بتدور على قطع غيار لسيارة معينة ومفيش مانع ان القائمين على المنتدى وهم اشخاص طبعا على خلق ونثق فيهم جدا يعملوا لنا زى دليل لتجار قطع الغيار الامناء بدل ماندوخ وندبس فى حاجات بايظة او غالية انا اخر مرة وانا عند العفشجى لاقيت واحد معاه جاجوار وحاللها ودايخ على طقم تيل فرامل وراح مصر وراح اسكندرية وبعدين قالوله روح الغردقة شوف بصراحة اشفقت عليه وحمدت ربنا على اللى معايا