|
تعبت من طلمبة البنزين
هل فى بدائل لطلمبة البنزين الموجودة فى الموتور يعنى مفيش حاجة كهرباء وتتسقط فى التانك وفى موضوع قبل كده قريت فيه انه ممكن تركب طلمبة بنزين ميتسوبيشى 3 بار .... فانا عاوز اعرف هى دى كهرباء ولا عادية وايه موضوع 3 بار ده وهل فعلا ينفع ولا لأ
|
رد: تعبت من طلمبة البنزين
اخى الكريم طلمبة البنزين الميكانيكية عيبها الوحيد انها لما خلاص عمرها الافتراضى قرب ينتهى فى الايام شديده الحرارة بتتوقف عن العمل فلو عملت معاك كدا يبقى كل ما عليك انك ترمى القديمة وتشترى واحده جديده ايطالى او تركى وتخلى بالك وانت بتشتريها متكونش متركبه فى بعضها كبس لا هتلاقيها متركبه فى بعضها بمسامير مش كبس والعربيه هتشتغل معاك زى الفل بدون مشاكل بس لو غيرت لكهربا وكدا ساعتها بقى مش هنعرف الضغط المناسب اد ايه و ممكن تحصل مشاكل ان العربيه تشرق وكدا فخلينا فى فبريكتها احسن تحياتى لك |
رد: تعبت من طلمبة البنزين
:Wkiss5:سيــــــ باشـــــــــا ــــــــــــــــــد الحمد لله انك قريت الموضوع وشكرا لذوقك معاليك على ردك بس انا عاوز افهم شوية حاجات
1- هو فعلا ينفع تركب طلمبة كهرباء 2- وايه حكاية طلمبة ميتسوبيشى 3 بار 3- بالنسبة ان لو طلمبة كهرباء العربية ممكن تشرق "مش المفروض ان فى الكربراتير عوامة بتظبط كمية البنزين والزيادة بيرجع فى خرطوم الراجع للتانك ياريت تتابع معايا يا استاذ سيد فى الموضوع ده |
رد: تعبت من طلمبة البنزين
اقتباس:
اقتباس:
معلش يا باشا انى متبعتش لانى فعلا والله مبقتش بدخل زى الاول الايام ديه ظروف بقى معلش بص هجاو عليك سؤال سؤال 1:بالنسبه لان هل ينفع نركب طلمبة كهربا هو ينفع بدون مشاكل بس لو الميكانيكى اللى هيركب هيبقى عارف الطلمبة المناسبه ايه لانه لو ركب طلمبة مش مناسبه العربيه مش هتعرف تتهنى بيها وعلى طول هتشرق منك 2:هى مش طلمبة متسوبيشى بمعنى الكلمه يعنى اكيد الطلمبة اللى هتشتريها مش اصلى بنسبه 99.9 فكله صينى ده اولا ثانيا انا فعلا معرفش ايه الطلمبه الكهربائية المناسبه لل 128 بس انا من راءى تجيب الطلمبة بتاعت ال 128 لانها تعتبر ارخص من الطلمبات الكهربا و لما بتبداء عمرها الافتراضى ينتهى بتديك علامات قبلها مش بتقطع مره واحده زى الكهربا 3:اللى انا اعرفه ان فيه نوعين طلمبات الاول : ده بيلغوا فيه راجع البنزين علشان الطلمبة بيبقى فيها خاصيه ما الله اعلم كيفية عملها الخاصية ديه حضرتك ان اول ما الكربراتير بيتملى الطلمبة بتفصل واول ما يبداء يخلص الطلمبة بتشتغل تانى والنوع الثانى : بيبقى فيه خرطوم الراجع موجود بس الطلمبة الكهربا بتفضل شغالة على طول ما بتفصلش اما بالنسبه ليه العربيه ممكن تشرق حتى لو فيه راجع اقول لحضرتك لو الطلمبة اللى حضرتك جايبها اقوى من الطلمبة اللى المفروض تركب للعربيه مثالا نقول انت جبت طلمبة 4 بار و العربيه مثالا بتشيل طلمبة 2 بار وجيت حطيت الطلمبة فى العربيه اللى هيحصل ان الكربراتير هيتملى بسرعة و الراجع مش هيعرف يخرج البنزين اللى فايض بنفس سرعة الطلمبة الى بتضغط بنزين والله اعلم ومتابع مع حضرتك |
رد: تعبت من طلمبة البنزين
اقتباس:
انا هحكيلك علي موقف حصلي مع الطلمبه ونتيجته استنتجت الحل انا كان معايا 128 قعدت معايا 11 سنه ولسه بايعها السنه اللي فاتت اللي حصل اني سنة 2003 كنت مسافر اسكندريه بالعربيه مع والدي انا من الجيزه المهم اني كنت محتاج جركن سولار في شغل خاص بوالدي اليوم اللي سافرنا فيه قبل مسافر روحت البنزينه املي الجركن سولار وكان فيه ربعه تقريبا عامل البنزينة غلط وملالي الجركن بنزين بدل السولار فااضطريت افضي الجركن في التانك كله واملاه سولار مع العلم الجركن كان فيه ربعه سولار المهم مليت الجركن الكلام ده كان بليل ومشينا الفجر وبعد حوالي 120 كيلو ركنا نريح لقينا بنزين نازل من الموتور قدام فتحنا لقينا جوان الطلمبه ضرب من البنزين المخلوط بالسولار المهم مشينا شويه لحد ملقينا ميكانيكي المهم فكينا الطلمبه لقيناها مش نافعه ومفيش حد بتاع قطع غيار احنا علي الصحراوي والصبح بدري الميكانيكي ربنا يكرمه لقي عنده واحده قديمه مرميه طبعا فضينا البنزين كله وجبنا بنزين تاني وملينا التنك ومشينا وقبل مانمشي يعني بندردش مع الميكانيكي بنقولو احنا قلقانين ان الطلمبه تعطل بينا علشان هي قديمه المهم نده للصبي وقالو فضيلي التانك تاني وقالنا علي كام نصيحه كده تخلي الطلمبه تعيش طول العمر حتي لو قديمه او صيني واو الرداخ (الصباع) بتاعها متاكل والنصايح هي 1- انه يجيب خرطوم هواء كمبروسر ويحطو في التانك وتحط شويه بنزين وتفتح الهوا علشان تنضف مواسير البنزين وطبعا هتفك الخرطوم من عند الطلمبه من الامام عند الموتور هتلاقي البنزين اللي في التنك بقي يطلع من الخرطوم اللي عند الموتور وبالتالي اتأكدنا ان المواسير سلكه مش مسدوده 2- قالنا لما توصلو اسكندريه هاتو فلتر بنزين كبيييييييييييييييييييير اصلييييييييييييييييي بتاع العربيات الياباني الفلتر الواسع وتركبه عادي قبل الكربراتير وبالتالي المواسير قبل الطلمبه سالكه والفلتر بعد الطلمبه واسع يبقي الطلمبه مش هتتعب معاك علشان مسار البنزين سالك وقالنا دايما تغيرو فلتر البنزين باستمرار يعني الخلاصه اللي دايما يبوظ ويعطل طلمبة البنزين وخصوصا في الحر ان المواسير قبل الطلمبه والفلتر بعد الطلمبه بيكون فيهم شوائب ومسدودين فبيزودو الضغط علي الطلمبه ويبوظوها واقسم بالله لحد مابعت العربيه الطلمبه اللي كانت ركبه القديمة اللي كانت مرميه عند الراجل مشتكيناش منها لحد متباعت حتي في عز الحر يعني الخلاصه هتروح للميكانيكي بس يكون عندو كمبروسر ينظفلك التنك ومواسير البنزين ويركبلك فلتر كبييييييييييير واااااااااااااسع اصليييييييييي ومش هتشتكي تاني ابدا معلش انا رغاي بس الواحد مبيتعلمش غير لما بيتقرص |
| الساعة الآن 03:05 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017