|
كل واحد حصلو كدا يخش
يالا كدا يا جماعة بعيد عن جو المقارنات والكلام دا ...
كلـ واحد اكيد فاكر اول مرة يركب عربية ويسوقها يالا كل واحد يقولي موقف مضحك حصلو ... وانا مستني علشان اضحك :crazyW14::crazyW14::craz yW14: |
رد: كل واحد حصلو كدا يخش
لا يا حبيبى عايز نحكى احنا وانت تقعد تضحك
انت تحكى اول واحد واحنا وراك يا معلم :01FDAB~189: |
رد: كل واحد حصلو كدا يخش
انا بدات سواقة لما كان عندي 11 سنة
وكنت ساعتها طويل وبقعد على كرسي السواق ببقا شايف كويس ومع الوقت بقيت حريف سواقة (من وجهة نظري انما والدي كان بيقول عليا حمار ) ووالدي كان لما يجي مش الشغل يرن عليا وانزله علشان اركن العربية ومرة والدي رن عليا رحت نزلت بسرعة وركبت العربية علشان اركنها قررت اتحدى نفسي واركن بين عربيتين كانوا واقفين بالعرض موازيين للرصيف وكانت المسافة بينهم تكفي العربية المهم حاولت اركن بكل الطرق الممكنة المشكلة بقا اني ركنت العربية بطريقة غبية ومعرفتش اطلع العربية بين العربيتين اللي راكنين :shyy: قولت اعمل ايه ؟؟ حاولت اني اطلع بالعربية المهم لقيت ابويا قدامي قالي انزل يا فالح سبحان الله من اول مرة لقيت ابويا ركن صح بين العربيتين راح بص ع العربية وشاف الاكصدام الوراني متبهدل خالص ومخدوش ساعتها اترزعت حتة قلم وبعديها ابويا عاقبني بمنع ركن العربية لمدة سنتين وقبل ما يخلصوا السنتين دول راح ابويا بايع العربية وحاليا احنا معندناش عربية لكن انا بلف بعربيات صحابي شوية ههههه وتقبل تحياتي :Wkiss5: |
رد: كل واحد حصلو كدا يخش
انا أول مره كنت اسوق فى حياتى
كان عندى 12 سنه يعنى فى الاعدادى وكنت مع والدى عند الميكانيكى المهم الميكانيكى ومكنش فاضى وقتها ومعاه عربيه والدى سابلى مفاتيح العربيه وراح مشوار ولقيت الميكانيكى خلص العربيه اللى كانت معاه وبيقولى دير وش العربيه وهاتها عند الورشه طبعا ان شكلى لو قلت له مش بعرف اسوق هيبقى زباله اوووى قولت استعن بالله واجرب وكانت اول تجربه فى حياتى طبعا انا كنت عارف كل حاجه من دبرياج وفرامل وبنزين وغيارات وازاى ادور وكدا دورت العربيه ودوست دبرياج جامد واديت الاول وقمت رافع رجلى مره واحده قامت العربيه مبطله ليه بقا وازاى العربيه تبطل منى قومت مدور تانى وانا دايس دبرياج ورافع ورجلى سنه سنه ومزود بنزين واول ما الدواسه نصها او اكتر على العربيه طلعت امريكانى وواخده فى وشها وطايره طيران المهم انا قلبى فى رجلى بس فى نفس الوقت فرحان انى حركت العربيه وبعد اول 100 متر بدأت اتحكم فى العربيه والف والحورات دى وكلاكسات متقولش مولود على الدركسيون بس بأمانه كل ما افتكر الموضوع دا مبطلش ضحك والميكانيكى بعدها عرف انى دى اول مره كنت اسوق فيها وقالى يعنى لو خبطت العربيه كنت انا اللى هلبس فى الحيطه مع والدك |
رد: كل واحد حصلو كدا يخش
انا اول موقف لي كان وانا لسة يادوبك بتعلم سواقة وكانت اول حصة لي وكنت باخد الحصص على عربية البيت كانت 128 المهم مافيش ما كملناش الحصة والعربية عطلت وركنها المدرب في مكان كويس ونزلت اخدت تاكسي عشان اروح لحد ما اشوف ميكانيكي وفعلا نزلنا شوفنا ميكانيكي عشان نجيب العربية اخدته ورحنا عند العربية :shy:الميكانيكي طلع ما بيعرفش يسوووق يا نهااار طين والراجل كان فاكر اني بعرف اسوق واول ما يشغلي العربية هاطلع اجري بيها .. المهم انا قولتله ياعم الحاج انا لسة النهاردة كانت اول حصة لي وماكملتهاش كمان قالي سووقي انتي بس وعلى بركة الله .. اعدت بيني وبين نفسي أقول الراجل ده باينه اهبل ولا ايه ولا عايز يموت شهيد ما فهمتلوش المهم انا جريئة وماكنتش فارقة معاي برضه رحت قولتله طيب اركب واتشاهد وسوقت :06A7D5~132:تقريبا كدة من روكسي لحد ورشته في الزتون وطلعنا سلام الحمد لله
|
| الساعة الآن 12:38 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017