حد يفهمنى اعمل اية عشان زهقت !!
 

السلام عليكم ورحمة الله وبركاتة

دلوقتى كان عندى تسريب مية واكتشفت انة من الكوعة الكبيرة الخارجة من الردياتير دى وصلحتها الحمد لله
مافيش اسبوع والاقى الردياتير بيفضى خالص لوحدة فجأة كدة
وشيكت على كل الوصلات لقيتها سليمة ومافيش اى تسريب ظاهر
لدرجة انى قولت انا هاروح للميكانيكى وعملت حسابى انى هغير جوان وش سلندر مع انى معنديش اى اعراض لتلفة بس مافيش تفسير للتسريب دة غير منة عشان شيكت على كل وصلات الردياتير لقيتها كلها سليمة والردياتير نفسة سليم

المهم قبل ماروح للميكانيكى بيومين كدة حصل نفس الموقف بتاع الردياتير دة لقيتة فضى مرة وحدة كلة مع انى مشيك علية قبل ما اطلع مشوارى ولاقيتة مليان على الاخر
المهم بالصدفة كدة واحد صحبى لمح ان فى مياة بتنقط من تحت الموتور
بصيت على الحتة اللى بتنقط لقيت نافورة مياة جاية من تحت الكربيراتير
المهم روحت للميكانيكى وشرحتلة الوضع وشيك قالى مافيش مشكلة فى جوان الوش والتنقيط الجامد دة جاى من المانيفولد
فى حاجة زى طبة كدة غاطسة لجوة قالى اكيد هى دى اللى بتنقط مياة
وقالى هنعملها ب ارانديد احسن ما نفك المانيفولد ونجيب جوان وحوار
المهم عمل الموضوع دة وفعلا التنقيط اختفى
اخدت العربية ومشيت مشوار بتاع ساعة كدة وببص على الردياتير لاقيتة فضى تانى وفى تنقيط برضو من نفس الحتة
المهم رجعت للميكانيكى راح حاطط طبقة ارنديد تانية على الطبة وعلى الماسورتين الصغيرين اللى داخلين على المانيفولد وحوالين الطبة
واكتشفت صدفة كدة برضة ان فى خرطوم صغير مش باين طالع من المكنة داخل على المانيفولد الخرطوم دة مشقوق وبيسرب مية
المهم قطعنا الحتة البايظة وركبناة وحط الارنديد والدنيا تمام التمام والمفروض كدة خلاص المشكلة اتحلت
اجى بعديها بيوم ابص على الردياتير الاقية فضى تانى وابص على المانيفولد الاقية بينقط تانى اتجننت وروحت ركنت امها ونفسيتى فى الارض
عشان انا كدة حطيت طبقة ارنديد كبيرة مغطية الطبة تماما والخرطوم اللى كان مشقوق صلحناة وبالرغم من كدة بينقط بردة بس على بسيط شوية
والاغرب انة مش بينقط الا فى حالتين
1-فى السلانسية
2-لو العربية مطفية مش دايرة
المهم انا اسف للاطالة بس كنت عايز اعرف بس اية اللى ممكن يبوظ فى المانيفولد ويخلية ينقط مياة غير البتاعة اللى زى الطبة اللى فية دى ؟؟؟
يعنى المانيفولد دة فى مجارى مية وممكن مثلا يكون مشروخ من ناحيتها وبتسرب منها مش من الطبة ؟؟!
ولا الجوان بتاعة مثلا اتاكل وبقى يسرب ومش باين ؟؟
وفى حالة الجوان دى هل ينفع بدل ما افك المانيفولد احط سيلكون حرارى حوالين الجوان كدة مثلا يمكن يمنع الموضوع دة ؟!
يا جماعة افيدونى بالله عليكم لان الميكانيكى قلقنى من حكاية فك المانيفولد دى وقالى بلاش احسن عشان مانفتحش على نفسنا حوار مالوش لازمة
وانامحتار ومش فاهم لحد دلوقتى علاقة المانيفولد بتنقيط المياة

رد: حد يفهمنى اعمل اية عشان زهقت !!
 

لا داعى لليأس
اللى عمله اميكانيكى كان صح على أمل انه يجيب نتيجة و يريحك من وقت و مصاريف
لكن وارد و ده اللى حصل انه مجبش نتيجة غالبا نتيجة لتشقق الارنديد عشان المنطقة ديى بتتمدد و تنكمش نتيجة لشغل الماتور و تبطيله لمدة فالارنديد مش شرط يتحمل الحكاية ديى
الحل الجزرى هو فك المانيفولد و تنظيفه و الكشف عليه و غالبا سليم و تغيير الطبة و كده كده تغيير الجوان

رد: حد يفهمنى اعمل اية عشان زهقت !!
 

فى حل بسيط ممكن تجربه و لن تخسر أكثر من 15 جنيه أو أقل بأستخدام سائل لحام الرديتير بعد قرأة طريقة ألأستخدام بعناية ففى كثير من ألأحيان يعطى نتائج مبهرة و يصل إلى جميع مسارات المياه :120105~352:

رد: حد يفهمنى اعمل اية عشان زهقت !!
 

ممكن حضرتك تشرفنا فى مقابلة رابطة السفينة ال132 يوم السبت بعد بكرة ونشوف لها حل بإذن الله حتى لو هتفك المانيفولد مفيش مشكلة وسيبك من الميكانيكى اللى عاوز يصعبهالك كل حاجة بأمر الله لها حل

رد: حد يفهمنى اعمل اية عشان زهقت !!
 

طيب يا استاذ احمد تفتكر هو الميكانيكى لية قلقنى من موضوع ان احنا نفك المانفولد دة وقعد يقولى دة لو باظ فية حاجة العربية مش هتدور اصلا وهتبقى مشكلة ؟؟! هو ممكن مثلا لو اتفك واتركب تانى يبوظ فية حاجة ولا مجرد تعب زيادة لية فكسل يفكة ؟!
واية فى رأى حضرتك ممكن يجيب مياة من المانفولد غير الطبة دى عشان انا متأكد انى مغطيها تماما بال الارنديد لدرجة انها مابقتش باينة اصلا ولسة برضو فى مية بتنزل
وبالنسبة لتغيير الطبة دلوقتى انا مغرقها ارنديد هاغير الطبة ازاى هو الارنديد بيطلع ؟!
معلش انا اسف بسئل كتير بس الموضوع محيرنى جدا وكان هيضيعلى الموتور اكتر من مرة بسبب السخونة لولا ستر ربنا