سؤال لاهل اسكندريه؟؟؟؟؟؟؟؟؟؟؟
 

الموضوع اني فيه حاجات كتير كنت عاوز افهمها وعاوز اعرف اهل اسكندريه بيتعاملو معاها ازاي هو الموضوع اولا اني كنت في اسكندريه قضيت حوالي خمس ايام المهم اني كنت في شقة ناس في حته اسمها البيطاش المهم اني انا من الناس اللي بتحب اسكندريه من زمان اصلا وكانت حاسس اني نفسي اعيش هناك من زمان ويعني بعد المشوار ده عرفت اني اقاربي اللي هما اصحاب الشقه عاوزين يبيعوها وبصراحه الفكره جت في دماغي وكنت عاوز اقنع والدي بالموضوع بس الفكره اني لما فكرت في العيشه هناك لقيت نفسي بقول لنفسي :bb127bc6eab060e3e23 لاني بصراحه فيه كزا حاجه لاحظتها هناك خلتني اصرف نظر عن الموضوع ده بس بردو حبيت افهم ايه اسبابها من اهل اسكندريه المهم اللي لاحظته بقي هو اني فيه بيوت كتير قوي هناك فيها تشققات وحاسس انها مش مظبوطه ده غير بقي موضوع اننا جينا غسلنا هدومنا ونشرناها تقريبا تلت ايام ووالله بدون مبالغه في المده وبردو الهدوم فضلت مبلوله لحد اما دخلنا الهدوم كلها في اوده وشغلنا مروحه وثانيا لما رحنا الشقه لقينا الازاز مكسور لدرجة اننا شكينا اني فيه حد دخل سرق الشقه فسالنا البواب قالنا اني النوه في اسكندريه لما بتيجي بتعمل كده واللي كمان لاحظته اني كل المباني هناك او كل اللي انا شفتهم يعني كنت ملاحظ انها مبنيه بالطوب الخفيف الابيض فبصراحه حسيت اني الموضوع فيه قلق وبالاخص اني كل فتره بسمع عن بيت بيقع في الاسكندريه وبصراحه كل الاسئله دي كنت نفسي اعرفها من حد عايش هناك وعارف اني فيه ناس كتير في المنتدي معانا من اسكندريه فحبيت اعرف منهم حكاية المشاكل دي ومدى صحتها وازاي بيتعاملو معاها ؟؟

رد: سؤال لاهل اسكندريه؟؟؟؟؟؟؟؟؟؟؟
 

يا باشا مفيش الكلام ده انا الحمد لله بيت العيله فى العطارين بقالى حوالى 150-200 سنة الحمد لله مفيش حاجه.لاكن ده ميمنعش ان البيوت القريبة قوى من البحر بتعانى شوية من موضوع اليود و مياة البحر حتلاقى العمارة مصدية و حالتها كرب شوية كده و الحلل و اى حاجة معدن فى الشقى بتجنزر و تصدى بسرعه لاكن غير كده مفيش الكلام ال حضرتك بتقولوا.وبالنسبة للغسيل حتلاقييك جيت فى يوم الرطوبه فى عاليه قوى عشان كده الهواء متشبع بالمياه و مش مستحمل اى تبخير.لاكن خلى بالك دلوقتى ومن ساعة الثورة فى مقاولين بالهبل هدوا بيوت و فلل و طلعوا بيها ابراج فى زمن قياسى يعنى من الأخر انتحار.قلة ضمير بقى+قلة رقابه.فخلى بالك لو حتاخد شقه خدها فى عماره قديمه شوية........واى سؤال تانى انا تحت امرك

رد: سؤال لاهل اسكندريه؟؟؟؟؟؟؟؟؟؟؟
 

والله أنا خايف من العمارات الجديدة دي، بتطلع في اقل من شهرين واقل واحدة 14 دور... حدي عنده فكرة الكلام ده ينفع ولا ايه؟ معقولة مفيش خطورة على الأساسات يعني؟ دا في ناس بدأت تسكن كمان وفي أدوار عالية ...

رد: سؤال لاهل اسكندريه؟؟؟؟؟؟؟؟؟؟؟
 

رد: سؤال لاهل اسكندريه؟؟؟؟؟؟؟؟؟؟؟
 

أهلا بيك وبالناس اللي بتحب اسكندرية

أنا بس عايز أعرفك شوية حاجات عن اسكندرية عشان ما تتخضش

أول حاجة:
البيطاش ما تعتبرش في اسكندرية قوي.... البيطاش دي في العجمي، ودي أحد ضواحي اسكندرية... لو عايز تروح اسكندرية حتحتاج تمشي حوالي 15 -20 كيلو

تاني حاجة:
اسكندرية مدينة ساحلية لها طبيعة خاصة إن البحر من أمامها وبحيرة مريوط من ورائها، فتلاقيها عبارة عن شريط ما يزيدش عرضه عن 5 كيلومتر في أعرض مكان، وده بيعمل حاجتين مهمين جدا:

1- الرطوبة في اسكندرية عالية جدا في الصيف، وأعراض الرطوبة العالية إنك لما تعرق عرقك ما ينشفش لإن الهواء مليان ميه أساسا، ده غير الصدأ والأكل اللي بيرطب بسرعة، وبعض حشرات مختلفة عن اللي بتشوفها في الجو الجاف

2- مساحة الأراضي في اسكندرية محدودة جدا ، وده مخلي أسعار العقارات عموما أعلى من أي مكان تاني في مصر، وبعد الثورة.. كمية العمارات العالية اللي اتبنت في اسكندرية أكتر من اللي اتعملت في خمسين سنة فاتو (بالمخالفة طبعا)، ودول اوعى تفكر تشتري فيهم

تالت حاجة:
اسكندرية مدينة حيوية فيها كل أنشطة الحياة... من تجارة وسياحة وصناعة وزراعة ، وبنعاني من نفس المشاكل الموجودة في القاهرة من زحام وخنقة.. بس للأسف مازلنا بنتعامل على إننا أقاليم... ولو اتعمل في اسكندرية ربع اللي بيتعمل في القاهرة ... اسكندرية دي حتبقى أحلى مكان في مصر

رابع حاجة:
طبيعة الجو في اسكندرية في الشتا إن المدينة بتتعرض لنوات (والنوة معناها جو متقلب وغالبا عاصف وممطر)... لو ما عملتش حسابك وانت سايب شقتك ... ممكن تلاقي تلفيات بسبب الهوا الشديد والمطر... ده غير إنك لو مشيت في شوارع مش متسفلتة كويس حترجع كل يوم عايز تلبس جزمة جديدة لإن القديمة باظت من الطين

خامس حاجة:
العجمي بشكل عام ما فيهوش صرف صحي... وكل عمارة تحتها بيارة بتصرف فيها وبعدين تيجي عربيات الصرف الصحي تشيل الصرف ده كل فترة (بناء على طلبك)، بس دلوقتي المحافظة بتمد خطوط الصرف الصحي في العجمي، ومعرفش المشروع ده حيخلص إمتى... يمكن الناس اللي ساكنة في العجمي تفيدنا

سادس حاجة:
المباني في العجمي والساحل الشمالي عموما بتتبني بالطوب الجيري، يعني طوب متقطع من جبال جيرية، وده طوب قوي جدا وتقيل كمان (ولونه أبيض .. بيصْفَر بعد شوية) وحتلاقي شكله مش منتطم لإنه بيتقطع يدوي في المحاجر
إنما الطوب الأبيض الخفاف بيبقى لونه أبيض ناصع وأبعاده منتظمة، وده حتلاقيه في العمارات الجديدة عشان يخف الوزن على الأساسات

انا مش قصدي أقفلك من اسكندرية... بس لو عايز تاخد خطوة الحياة في اسكندرية لازم تعرف المشاكل زي ما شدتك المزايا


...