مصر موتورز مجتمع السيارات - صيانة ال 15000 كلم وسلملي على المترو...تنبية هام لاصحاب 516

بسم الله الرحمن الرحيم
والصلاة والسلام على اشرف المرسلين
سيدنا محمد صلى الله علية وسلم
كنت ناوي اعمل صيانة ال15000 كلم الاسبوع اللي فات ولكن لاننا اصبحنا بلد المليون مظاهرة معرفتش اروح الا اليوم وياريتني ماروحت
المهم انا ومتهيألي كل اصحاب الاسبرانزا كانو فاهمين ان صيانة ال 15000 كلم دي زي ال5000 كلم بالضبط
يعني شيك اب عادي وخلاص ويلفح منك بالضريبة 100 جنية
المهم رحت النهاردة لقيت مهندس الاستقبال بيقوللي بقينا بنغير البوجيهات والفلاتر كمان عند ال15000 كلم
قلتله مش دول بيتغيرو عند 20000 كلم
قاللي ياباشا البنزين اللي عندنا في مصر زباله داحنا المفروض نغيره عند 10000كلم
قلتله اوكية ماشي وزودت كمان شوية ملاحيظ عن باب تانك البنزين اللي بيفتح وانا ماشي لوحدة وعن رزعه في المساعد الايمن مش دايما بس بتحصل عند المطبات الرخمة
المهم كنت طبعا حاجز قبليها وكنت هناك الساعه8:20 صباحا...وخلصت الحمد لله الساعه 10:30 صباحا وقاللي كله تمام
بصراحة سقت العربية ماحسيتش بفرق خالص بس اللي توقعتة ان التغيير دا سببة ان صيانة ال20000 كلم لما كان فيها تغيير زيت وفلتر زيت وكمان بوجيهات وفلاتر(بنزين وهوا)كانت بتبقى تكلفة جامدة ممكن تخللي ناس كتيرة تكبردماغها وتعملها برة عند اي مركز وخلاص
فابو الفتوح النبية طبعا في شفط جيوب الزبون قالك نقسمها شوية عند ال15000كلم والباقي عند ال20000 كلم
انا كاتب الموضوع دا في الاساس تنبية لاصحاب العربيات ال516 اللي معملوش لسة صيانة ال15000 كلم
المهم التكلفة النهائية بعد الضريبة والذي منه299.99 جنية (شوفتو الدقة اللي تشل)